Haree ba impaktu negativu husi pandemia Covid-19 iha ekonomia nasionál mak Governu propoin alterasaun ba lei 14/2020 ho medidas foun oioin, inklui medida seguransa alimentár.
“Lei ne’e fó kbiit ba Centro Lojístiku Nasional (CLN) atu halo kontratu ho produtór lokál no operadór komersiál sira seluk, hodi hetan ai-han nesesáriu fahe ba ita-nia ema no família sira ho rendimemtu kiik tebes,”relata husi Komunikadu Imprensa Casa Sivil iha Palásiu Prezidensiál Nicolau Lobato, Díli, Tersa ohin.
Tanba Liu husi sosa ai-han, liuliu husi agrikultor sira hodi fahe ba ema no família vulnerável liu, Estadu Timor-Leste insentiva produtór sira atu hasa’e sira-nia produsaun.
Nune’e, kontribui ba família agrikultór sira hodi moris-di’ak liu. Tanba, fahe produtu husi agrikultor sira ba ema no família timoroan sira ne’ebé vulnerável liu, Estadu Timor-Leste hatudu tau duni matan ba sidadaun sira iha tempu susar.
Nune’e, Dekretu-Lei ida ne’e fó atensaun espesiál ba ema no família sira ho rendimentu laliu dólar amerikanu 1,90 loron ida.Atu define sesé mak iha direitu ba apoiu espesiál ida ne’e, entidade responsável sira sei uza dadus husi rejistu uma-kain ida-idak iha suku ida-idak husi Ministériu Administrasaun Estatal no husi Ministériu Solidariedade Sosiál no Inkluzaun.
Ne’ebe Ai-han ho valor dólar amerikanu tolu nulu (Usd 30.00) se fó ba sidadaun ne’ebé rejista-an iha “Livru Rejistu Uma Kain” nu’udar Xefe família ka, bainhira labele simu, sei reprezenta husi membru ida husi Uma Kain ne’e, ho otas 17 ba leten.
Entertantu Medida ida ne’e sei implementa ho osan husi Fundo Covid-19 ne’ebé tama iha Orsamentu Jerál Estadu no sei implementa to’o 31 dezembru 2021 maibé MECAE bele hatutan tan.
Diploma ne’e aprova iha Konsellu Ministrus iha 27 Outubru 2021, tama iha Prezidénsia Repúblika iha 8 Novembru 2021 no Prezidente Repúblika promulga iha 10 Dezembru 2021.
Ministru Koordenador ba Asuntus Ekonómikus, Ministru Finansas, Ministru Admnistrasaun Estatal no Ministra Solidariedade Sosiál no Inkluzaun mak sei regulamenta Dekretu-lei liuhusi diploma konjuntu ida kona-ba oinsá implementa hodi benefisia ema no uma kain sira ho rendimentu la liu dólar amerikanu 1.90 loron ida.
