Kestaun ne'e, Xefe Estadu hato’o nia posizaun relasiona ho karta notifikasaun hosi Polisia Nasionál Timor-Leste (PNTL), liuhosi Servisu Investigasaun Kriminiál Nasionál, ho númeru ofísiu 112/Gab/CHEFE/SIC/PNTL/X/2022, ba Jornal Diáriu INDEPENDENTE ho nia sentidu urjente atu halo identifikasaun ba Jornalista Domingos Gomes ho Xefe Redasaun, Jorginho Dos Santos, tuir kódigu Prosesu Penál artigu 53 tanba deskonfia komete krime.

“Ha’u sei buka hamriik iha jornalista nia-kotuk, iha jornál nia kotuk, atu defende direitu no liberdade atu bele hakarek. Ha’u sei haree ida ne’e. Ha’u nu’udar Xefe Estadu, ha’u sei akompaña ida ne’e,” dehan nia ba jornalista sira iha Kuartél Jenerál-F-FDTL, Fatuhada, tersa ne’e (25/10).

Tuir nia katak, parte justisa tenke preokupa ho krime organizadu, ema halo passaporte falsu, droga ou ema buka halai sai ho osan hosi Timór arbiru la tuir regra.

“Ida ne’e mak ita tenke haree hamutuk la’ós ita ba preokupa fali ho jornalista sira nia serbisu”, nia lamenta.

Relasiona ho Lei Kriminaliza Difamasaun, Prezidente Repúblika afirma tenke muda tiha lei refere hodi fo liberdade ba media

"Ha'u kontra lei kontra kriminaliza difamasaun tenke muda tiha lei ne'e atu ita nia liberdade totál ba mídia," nia hato'o.

"Ida difamasaun ne'ebé krime ne'e di'ak liu muda ona, ne'e ha'u sei haree ida ne'e no sei halo diálogu ho Governu no Deputadu sira hotu atu husu favor hatun tiha lei kriminaliza difamasaun ida ne'e".