PR Horta dehan, lansamentu ne’e hanesan prova ida ba reziliénsia setór privadu Timor-Leste nian no pasu vitál ida hodi haluan tan ligasaun internasionál nasaun nian.
“Konektividade rejionál mak pilar importante ba integrasaun Timor-Leste nian iha ASEAN, liu-liu bainhira nasaun prepara an ba Simeira ASEAN 2029,” Dehan PR Horta iha lansamentu voo dahuluk Aero Dili ba Kuala Lumpur, iha Aeroportu Internasionál Nicolau Lobato, Sábadu (28/03).
Xefe Estadu hatete, benefísiu oi-oin husi rota ne’e, husi haburas komérsiu no turizmu to’o fasilita viajen ba tratamentu saúde liu husi parseria Aero Dili nian ho Sentru Médiku Mahkota iha Malázia.
Diretór Ezekutivu Aero DIli, Lourenço de Oliveira, PR Horta apoiu maka’as ba inisiativa lokál sira ne’ebé dudu dezenvolvimentu ekonómiku.
Tanba ne'e, PR Horta korajen entre setór públiku no privadu hodi dudu inovasaun nasionál.
Iha fatin hanesan, Embaixadór Malázia, Dato' Amarjit Singh espresa sentimentu ne’ebé hanesan, hodi nota katak aumentu voo sira ne’e sei hametin liután relasaun bilaterál no apoia kampaña vizita Malázia 2026.
Entretantu, Ministru Transporte no Komunikasaun, Miguel Marques Gonçalves Manetelu reforsa fali Governu nia kompromisu hodi moderniza infrastrutura aeroportu nian.
Nune'e, konektividade foun ne’e nia oráriu semana nian, Aero Dili opera iha loron Tersa no Sábadu sai husi Dili tuku 08:00 dader no fila tuku 12:15 meudia, enkuantu Batik Air oferese voo iha loron-Segunda, Kuarta, no Sesta sai husi Dili tuku 08:20 dader no fila tuku 02:15 madrugada.
Nia subliña, ida ne'e la’os deit kona-ba haluan konetividade, maibe hatudu mos Timor-Leste nia prezensa no identidade Timor-Leste nian iha fatin sira ne'ebé Aero Dili Atera.
“IX Governu Konstitusional fo importansia ba setór transportes, nu’udar pilar importante ida iha Dezenvolvimentu Ekonomiku nasaun nian. Governu nia papel mak atu kria kondisaun ba kreximentu ekonómiku, hadi'a no aumenta sirkulasaun ema no sasăn, tuir vizaun ne'ebe hatur ona iha planu estratejiku Dezenvolvimentu 2011-2030,” Nia afirma.
Nia haktuir, tanba transporte aéreo sai nu'udar servisu-xave ida, ba movimentu ema no sasan mai Timor-Leste no husi Timor-Leste ba rai-li'ur, no sei tulun atu dudu dezenvolvimentu industria turistika, komersiu no negosius seluk.
Maibe liu-liu atu hetan konfiansa ba ligasoens entre Timor-Leste no destinos rejionais no internasionais, mak Governu sei esforsa atu kria kondisoens ba aumento voo reguler ho opsoens barak liu tan.
“Nudar kompromisu ida Governu nian mós atu melhora fasilidade sira Aeroporto nian, hasa'e konhesimentu ita nia Autoridade no Administasaun aeroportu nian, inklui hadia regulamentus nesesarius hodi garante kumprimentu ita nia rain nian ba kompromisus no padraun internasional iha setor aviasaun nian. Hau hein katak, ho voo direta husi Dili ba Kuala Lumpur, sei fo liu tan konfiansa ba paizes sira seluk, liu-liu paizes membru ASEAN nian, hodi bele loke odamatan ba Timor-Leste hodi bele iha konetividade direta ba sira nia rain no mos husi sira nia rain mai Timor-Leste,” Nia salienta.
Iha Tempu hanesan, Diretor Ezekutivu Aero Dili, Lourenço de Oliveira hato'o agradese ba Embaixadador, Prezidente Repúblika no Governu ne'ebé sempre apoiu Aero Dili hodi halo inagura ba aumenta liña foun ba Malázia.
“Rota foun ba Kuala Lumpur aumenta opsaun ida tan ba konetividade voo rejional no internasional, tanba Kuala Lumpur hanesan fatin ne'ebe konveniente ba tranzitu ho opsaun voo barak. Rota Kuala Lumpur mos loke hodi prepara ba inkontru ASEAN iha 2029 iha Timor-Leste,” Kata nia.
Nia afirma, Aero Dili sei nakloke atu servisu hamutuk ho kompanhia aérea nasional Malázia nian, inklui Batik Malázia hodi hafasil pasajeiru atu hili koneksaun voo Aero Dili no mos halao kooperasaun ho Mahkota Medical Centre iha Malaka, Malázia. Hodi fasilita maluk sira ne'ebe presiza atu halo tratamentu saude.
“Vantajen ne'ebe ami iha mak ami bele simu pasiente ne'ebe usa Stretcher. Hamutuk ho Mahkota Medical Centre, ami sei fornese servisu ne'ebe adekuadu no tuir standard. Ho rota foun ida ne’e, ami hein katak bele atrai liu-tan ema barak atu mai visita Timor-Leste, tantu mai halo negosiu ou mai hanesan turista, no hodi kontinua fo apoiu iha ajenda ASEAN nian,” Nia hakotu.
Purtantu, Prezidente Repúblika, José Ramos Horta akompaña husi Vise-Primeiru Ministru, Mariano Assanami Sabino, Ministru Negósius Estranjeirus no Kooperasaun Bendito Freitas, Ministru Transporte no Komunikasaun, Miguel Marques Gonçalves, Vise Ministra Negósius Estranjeirus no Kooperasaun, Jesuína Maria Ferreira Gomes no Embaixadór Malázia, Dato' Amarjit Singh.
