Tuir komunikadu ne'ebé Diariu ne’e asesu, Xefe Estadu garante kondisaun ba investimentu internasionál, hanesan seguransa no polítika Timor-Leste ba setór privadu portugés sira no husu atu labele laran taridu hodi halo investimentu, tanba Timor-Leste seguru liu kompara ho nasaun sira seluk ne’ebé mosu bebeik konflitu.

Xefe Estadu prefere empreza sira atu loke investimentu iha área bankária hanesan BNU, fábrika sepatu, ropa, ai-moruk no harii infraestrutra armajen hodi rai ai-moruk fahe ba nasaun sira iha ASEAN no seluk tan.

Xefe Estadu esplika, pozisaun Timor-Leste atu sai membru ASEAN hodi fó oportunidade boot ba merkadu. Tanba ne’e. produtu husi Portugal nian reprezenta nasaun europeia tomak, bele tama ba merkadu ASEAN liuhusi Timor-Leste.

Molok ne'e, iha loron 26 Setembru 2022 vizita ba Novaiorke, koordena ho reprezentante Lideransa Fundasaun Open Society Foundation, George Soros, nia ekipa ne'ebé antes ne'e ba ona Dili, hodi halo estudu kona-ba ekonomia Timor-Leste ne’ebé sei lansa polítika modernizasaun ekonomia Timor-Leste iha 2023.

“Ha’u ko’alia ona George Soros haruka ona ekipa ida ba Timor-Leste hodi halo estudu ba ami-nia ekonomia ne’ebé ami sei lansa dokumentu ida hanesan dalan ida ba modernizasaun Timor-Leste nia ekonomia iha tinan 2023,” dehan PR Horta.

Programa modernizasaun ekonomia sei la’o tuir Planu Estratéjiku Dezenvolvimentu Nasionál-PEDN 2011-2030 ne’ebé antes ne’e governu anteriór kria no sosializa ona ba povu tomak, maibé tuir Horta katak, planu hirak ne’e sei haree fila fali.

Parte seluk, Vise-Prezidete Kámara Komérsiu Indústria Timor-Leste, Fernando da Silva, agradese ba esforsu Prezidente Repúblika, Ramos-Horta nian, tanba bele involve sira koopera ho setor privadu Português hodi ba loke investimentu iha Timor-Leste.

“Ita prontu atu servisu hamutuk ho setor privadu Portugal para kria kampu servisu ba ita nia Timoroan sira, no governu tenki asegura estabilidade polítika no kria seguru de vida, hodi fo garante ba ema loke investimentu,” nia hatete.

Fernando sujere importante liu ba Timor-Leste maka governu presiza kria didi’ak lei investimentu no lei ba rai fo garante ba setor privadu estranjerus loke investimentu no kria kampu servisu ba Timoroan sira.

Asuntu seluk tan maka tenki regula investimentu sira ba Timor-Leste, mak tenki ba ho kapital boot, tanba dadaun ne’e governu fo livre ba ema faan sasan nesesidade bázika husi estranejerus, maibé Timoroan sai abandonado iha nia rain rasik.

Entretantu, enkontru Prezidente Repúblika José Ramos Horta akompaña direita husi Vise Prezidente CCI-TL Asuntu Transporte no Telekomunikasaun, Fernando da Silva, Emprezáriu Sancão Gomes, Na’in ba Empreza Esperansa Timor Oan-ETO, Nilton Gusmão no grupu emprezáriu feto Timor.

Governu nian reprezenta husi Ministra Ministra Negosiu Estranjerus no Kooperasaun, Adaljiza Magno, Embaixadora Timor-Leste ba Portugal, Isabel Amaral Guterres, Embaixadora Portugal ba Timor-Leste, Maria Manuela Bairos.

Nune'e, Prezidente Repúblika José Ramos Horta simu tomada de posse iha loron 20 fulan Maiu tinan 2022, Xefe Estadu hala’o vizita estadu ba nasaun sira hanesan, Indonézia, Austrália, Amérika, Kambodia no Portugal hodi konvida emprezáriu bele loke investimentu oin-oin iha Timor Leste.