Xefe Estadu ko'alia durante vizita ida ba fatin instalasaun edifísiu Tribunál Supremu foun iha Mandarin, Dili, Xefe Estadu destaka katak hafoin besik um-sékuartu sékulu desde restaurasaun independénsia, Timor-Leste iha ona tempu ne'ebé natón atu prepara-an.

Prezidente hateten katak nasaun ne'e agora iha kapasidade tomak no iha devér konstitusionál atu realiza marku judisiál ne'ebé hein kleur ona ne'e molok selebrasaun aniversáriu ba dala-25 iha tinan 2027.

Prezidente fó-avizu maka'as hasoru adiametu liután, hodi aponta ba kalendáriu polítiku exijente ne'ebé sei mai, inklui eleisaun Prezidensiál 2027, eleisaun Parlamentár 2028, no Prezidénsia ASEAN 2029.  

“Prezidente Ramos-Horta alerta katak hein to'o tinan 2027 nia laran ne'e legálmente inviável, tanba Lei eleitorál sira bandu rigorozamente kriasaun ba instituisaun foun sira ka asinatura ba kontratu boot sira iha fulan neen nia laran molok konvokasaun eleisaun nian. Konsekuentemente, Prezidente estabelese prazu deizisivu ida ba fulan-novembru, hodi husu ba Governu no Ministériu Justisa atu halo inaugurasaun tribunál nian nu'udar prioridade nasionál imediata,” Sita Komunikadu ne’ebé online INDEPENDENTE asesu husi Média-PR, Sexta (22/04).

Remata ninia diskursu, Prezidente Ramos-Horta espresa ninia apresiasaun kle'an ba esforsu kolaborativu ne'ebé la'o hela atu prepara instituisaun judisiál foun ne'e. Xefe Estadu elojia Prezidente Tribunál Rekursu, juís venerandu sira, no Ministériu Justisa ba sira-nia dedikasaun firme ba projetu ne'e. Prezidente reafirma apoiu inabalável husi Prezidénsia ba reforsu konstitusionál tribunál sira-nian, hodi garante setór justisa ida ne'ebé forte no independente liután ba povu Timor-Leste.