Hafoin sira-nia enkontru regulár iha Palásiu Prezidensiál, Primeiru-Ministru Xanana Gusmão hato’o Xefe Estadu nia orgullu boot ba oinsá públiku salvaguarda nasaun nia naran.

“Selebrasaun ne’ebé hakmatek ne’e husik impresaun di’ak tebes no pozitivu ba dignatáriu no investidór estranjeiru barak ne’ebé marka prezensa, ne’ebé projeta imajen forte husi Timor-Leste ida ne’ebé estavel no prontu atu habelar ninia parseria internasionál no hametin ninia papél iha ASEAN nia laran,” Sita komunikadu ne’ebé Online INDEPENDENTE asesu husi Média-PR, Sexta (22/05).

Durante enkontru ne’e, líder rua ne’e mós diskute kestaun nasionál urjente sira, inklui progresu husi Orsamentu Retifikativu ne’ebé agora dadaun iha Parlamentu Nasionál.

Prezidente Ramos-Horta hetan informasaun kona-ba esforsu lalais husi governu atu asegura fundu nesesáriu hodi garante fornesimentu kombustivel (mina), garante seguransa ai-hán ba tempu naruk, no mantein operasaun instituisaun Estadu nian la’o nafatin.

Prezidente rekoñese pasu proativu husi governu nian no fó apoiu ba aprovasaun orsamentu nian ne’ebé antisipa iha inísiu fulan-juñu, hodi fó prioridade ba prestasaun servisu públiku ne’ebé kontínua.

Maski reflete ba susesu husi selebrasaun nasionál sira, Prezidente Ramos-Horta kontinua foku maka’as mós ba dezafiu imediata ne’ebé povu hasoru, liuliu iklima ne’ebé ladi’ak no inundasaun foin lalais ne’e ne’ebé afeta munisípiu sira iha iha rai laran hanesan Viqueque, Lautem, no Covalima. Hafoin foin lalais ne’e dedika ninia tempu atu vizita komunidade afetadu sira, Prezidente subliña nesesidade husi apoiu governu nian ne’ebédi’ak liután.

Hamutuk ho Primeiru-Ministru, Xefe Estadu enfatiza katak valor loloos husi independénsia ne’e depende ba vizaun nasionál ne’ebé firme ida ne’ebé onra erói Timor-Leste sira-nia sakrifísiu liuhusi hadi’a loloos povu nia moris loroloron no di’ak ba sidadaun hotu-hotu.