Enkuantu, Iha enkontru asembleia jerál ONU ne’e, Prezidente Repúblika, José Ramos-Horta, mós sei hato’o diskursu estadu Timor-Leste nian, no sei ko’alia assuntu nasionál no sei sai hanesan relatoriu pozitivu ba komunidade internasionál kona-ba situasaun iha Timor-Leste.

“Mais ha’u nu’udar Xefe Estadu, ha’u la ko’alia lori ha’u-nia naran pessoál, ha’u lori naran estadu nian, entaun ha’ nia diskursu kuaze bele hatete, relatóriu ida Timor-Leste nian ba komunidade internasionál kona-ba progresu Timor-Leste halo iha páz no seguransa iha rai laran, iha toleránsia polítika, toleránsia rekonsiliasaun Timor-Leste nian ké ita rai ida segundu maiór paíz katóliku iha mundu ho minoria musulmanu no protestante, maibé relasaun ho komunidade sira seluk di’ak teb-tebes, laiha konflitu relijiózu, laiha konflitu étniku, ne’e relatóriu ida di’ak ba mundu,” informa Prezidente Horta.

Aleinde, iha Assembleia Jerál ne’e, Xefe Estadu mós sei ko’alia kona-ba situasaun iha Ukránia ne’ebé iha, fó impaktu ba mundu, adezaun Timor-Leste ba ASEAN, Organizasaun Mundiál Komérsiu (OMK), susesu Timor-Leste iha mitigasaun no kombate ba pandemia covid-19 no seluk tan.

Durante iha Nova Iorke, Xefe Estadu mós sei hala’o enkontru bilateral ho Primeira-Ministra Nova Zelándia, Jacinta Ardern, Primeiru-Ministru Kambodia, Hun Sen, Prezidente Kosovo no juíz hosi tribunal anti-korrupsaun internasionál, Juíz Mark Wolf.

Enkontru ho Senadór Patrick Dodson, enviadu espesiál ba rekonsiliasaun no implementasaun kona-ba deklarasaun Uluru hodi fuan, no partisipa mós iha simeira altu-nível g7+ nian.

Entretantu, Xefe Estadu ho delegasaun, sei fila hikas mai Timor-Leste, iha loron 27 setembru 2022.