Prezidente Parlamentu Nasionál, Aniceto Longuinhos Guterres Lopes hateten, iha implementasaun sesta bazika, Parlamentu Nasional la fó sala governu, maibé presiza fiskaliza tanba kestaun kualidade.

“Ko’alia kona ba kualidade ema sempre kestiona ona bebeik ona, ne’e duni ha'u hanoin governu tenke aprende situasaun ne'e, depois kontrola didi'ak kualidade sasán ne'ebé fahe," informa Aniceto Guterres iha Parlamentu Nasionál, (19/07).

Nia haktuir, Parlamentu Nasionál mós husu ba komisaun kompetente tenke halo koordenasaun atu fiskaliza mós programa sesta bazika.

" Rekursu barak mak ita koloka iha ne'ebá, tenke iha benefisiu no tenke iha kualidade di'ak," tenik nia.

Iha fatin hanesan, Deputadu Bankada CNRT, José Virgílio Ferreira hatete, komunidade balun iha Aldeia Fomentu II, Suku Komoro seidauk simu sesta bazika faze dahuluk nian.

"Ema rain na'in iha ne'ebá Xefe Aldeia lakohi fahe to’o agora, hahú kedas sesta bázika faze dahuluk nian hamutu 35 xefe familia, agora sa'e ba 100 mak seidauk simu nia direitu,” tenik nia.

Nia hateten, tanba ne'e mak sira hato'o mai atu husu ba governu tenke rezolve ida-ne'e, tanba saida mak lakohi fahe ba ema sira.

" Sira dehan ba ha'u, se sira lakohi fahe, ami sei lori prosesu ne'e ba oin, ha’u dehan ba sira di'ak liu ita boot sira lori prosesu ne'e, tanba ita boot sira nia direitu tenke hetan," nia argumenta.

Deputada Bankada CNRT, Maria Barreto hateten, reklamasaun husi benefisiariu sesta bazika sira hato'o katak sira ne'ebé mak sai reklamasaun ba tinan 2021 to'o governu seidauk rezolve.

"Agora dadauk distribuisaun Sesta Bázika ba iha populasaun mós sira nafatin la hetan ne'ebé sira hato'o mai, atu husu ba governu tanba saida uluk mós sira la hetan, agora mós sei nafatin laiha direitu ba Sesta Bázika," dehan nia.

Nia hateten, sesta Bázika iha munisípiu Bobonaru ni'an informasaun husi benefisiariu sira katak iha tinan kotuk bainhira distribuisaun Sesta Bázika sira hetan mós na'an, maibé tinan ida-ne'e sira la hetan.

"Lori fila-fali mak modo tahan, repoilo, mostarda dodok fahe ba sira, Depois lori fila-fali foremungu, koto ne'ebé fuhuk de'it, ne'ebé sira dehan see osan la to'o di'ak liu fahe osan ba sira mak sira halo kompras rasik tuir nesesidade uma laran nian, ida-ne'e mak sira nia sujestaun mai hato'o mai ami," tenik nia.

Deputadu Bankada Fretilin, Dario Madeira hateten, implementasaun Sesta Bázika iha suku Komoro ne'ebé Deputadu sira levanta ne'e tebes.

"Ha’u la fó sala, maibé ha'u hakarak Xefe suku no Xefe Aldeia tenke halo servisu ida sériu, besik nia populasaun sira, rekolla sira nia fixa família atu bele atende sira," dehan nia.

Nia hateten, tanba sira tinan uluk la hetan no tinan agora la hetan nafatin, maibé ida-ne'e la'ós primeiraves Deputadu sira levanta iha fatin ida-ne'e.

"Kuaze faze Sesta Bázika faze primeiru ko'alia beibeik laiha atendimentu to'o agora tama segunda faze Sesta Bázika nafatin, sira nia direitu laiha nafatin de'it. Husu ba governu atu tau matan ba ida-ne'e," tenik nia.

Hatan ba ne'e, Sekretáriu Estadu ba Komunikasaun Sosiál (SEKomS), Merício Juvinal dos Reis “Akara” hateten, rejistu preokupasaun Deputadu sira nian, sei rekomenda ba Ministériu relevantes hodi fó respostas.