Ministru ne’ebé akompaña PM Xanana mak Ministru Administrasaun Estatál (MAE), Tomás do Rosário Cabral, no Ministru Planeamentu no Investimentu Estratéjiku (MPIE), Gastão Francisco de Sousa.
Prezidente Autoridade Munisipiu (PAM) ne’ebé hola parte iha delegasaun ne’e mak: Prezidente Autoridade Baukau, Veneranda Eurico Marques Lemos Martins, Prezidente Autoridade Munisípiu Ainaro, Manuela Georgina Carmo Bucar Corte-Real, Prezidente Autoridade Manatuto, Luis Inácio Henriques Fernades, Prezidente Autoridade Munisípiu Kovalima, Miquel Armando Cardoso no Prezidente Autoridade Munisípiu Manufahi, Luis Marçal da Costa Tavares.
PM Xanana ho delegasaun semo ho Aero Dili no tuun iha aeroportu internasional Huanghua Changsha ne’ebé simu direta husi Governadór Provínsia Hunan, Mao Weiming, akompaña husi Vise Prezidente Komisaun Permanente Assembleia Populár Provínsia Hunan, Wang Junshou, Embaixadora Xina mai Timor-Leste, Wang Wenl, Embaixadór Timor-Leste ba Xina, Loro Horta, Adidu Defeza TL iha Xina, Koronél Cezário Marçal Ximenes ‘Haksolok’, Diretór Aero Dili, Lorenço de Oliveira, no estudante Timor-oan sira iha Xina.
Governadór Mao ho Embaixadora Wang hato'o bemvindo ba Xefe Governu ho delegasaun tanba bele vizita provínsia ne’e bodi hametin kooperasaun ne'ebé estabelese ona ho Munisípiu Manatuto iha tinan 10 nia laran.
“Bemvindo ba Primeiru-Ministru, Xanana Gusmão. Ami orgullu no agradese tebes bele simu ita-nia vizita mai iha provínsia Hunan bodi hametin liu tan kooperasaun ne'ebé ita estabelese ona,” dehan Governadór Mao hanesan Online INDEPENDENTE sita husi pajina ofisial Primeiru Ministru, Segunda (14/04).
Iha oportunidade banesan, Xefe Governu halo kedan reniaun ho membru Governu na'in rua no Prezidente Autoridade sira inklui Embaixadór Timor-Leste ba Xina, Loro Horta, bodi diskute ajenda vizita husi 13 to'o 17 Abril 2025.
Durante enkontru, PM Xanana ho delegasaun elabora planu no idea husi kada munisípių atu aprezenta kooperasaun ho Autoridade Provínsia Hunan iha área agrikultura, pekuária, peska no seluk tán.
Tuir ajenda iha 14 Abril 2025, Xefe Governu ho delegasaun sei hala'o vizita ba praça Mao Zedong hodi presta omenaien, inklui vizita fatin istóriku no rezidénsia antiga, Mao Zedong.
Iha parte lorokraik hala'o vizita ba Institutu Jeologia Provínsia Hunan hodi bala'o reuniaun ho líder importante sira kona-ba kooperasaun Timor-Leste ho Hunan, no atividade seluk tan.
