PM Xanana Husu Funsionariu SEI Hala’o Servisu ho Kualidade Featured

By Ivonia Varela Novembru 11, 2023 3567
Primeiru-Ministru, Kay Rala Xanana Gusmão, sabado ne’e hala’o vizita ba edifisiu Sekretáriadu Estadu Igualdade, hodi observa direita kondisaun edifisiu refere. Foto:INDEPENDENTE. Primeiru-Ministru, Kay Rala Xanana Gusmão, sabado ne’e hala’o vizita ba edifisiu Sekretáriadu Estadu Igualdade, hodi observa direita kondisaun edifisiu refere. Foto:INDEPENDENTE.

DILI: Primeiru-Ministru, Kay Rala Xanana Gusmão, sabado ne’e hala’o vizita ba edifisiu Sekretáriadu Estadu Igualdade, hodi observa direita kondisaun edifisiu refere.

Iha biban ne’e, Primeiru Ministru mós husu ba funsionariu tomak husi Sekretáriadu Estadu Igualdade nian, atu kontinua hala’o servisu ho kualidade no profisionál ba povu Timor-Leste no nasaun.

Xefe Governu husu ba SEI kontinua kaer metin vizaun no misaun SEI atu valoriza, proteze no promove dignidadi no direitus humanus, inklui direitu sira feto sira nian atu alkansa ninia objetivu sira. Tanba bainhira SEI hala’o servisu ho kualidade no profisionál maka sei bele fó susesu ba vizaun atu promove kultura igualdade jéneru iha Timor-Leste.

“Ohin mai iha ne’e ita ko’alia badak, maibé ha’u husu ba imi servisu nafatin ba atu presta servisu ho kualidade no professional. Nune’e ita bele promove igualdade jeneru iha Timor-Leste, liliu atu haree ba feto sira,”dehan Xefe Governu, iha Salaun Maria Goreti, SEI, Obrigada Barak, Kaikoli, Dili, (11/11/23).

Iha fatin hanesan Sekretária Estadu Igualdade (SEI), Elvina de Sousa Carvalho hato’o agradese ba vizita Xefe Governu nian hodi rona no hato’o mensajen xave ba ekipa atu servisu ho kualidade.

Entretantu, iha biban ne’e, Sekretária Estadu Igualdade, Elvina aprezenta mós planu estrateziku SEI nian ne’ebé prepara ona no sei hala’o programa barak hodi foka ba abordajen integradu jéneru iha governu no fó influensia ba lei no polítika sira atu halo sira iha sensibilidade ba jéneru ho misaun importante seluk tan, mak hanesan asegura jéneru aborda iha estrutura institusionál, entidades no mekanizmu governu nian, ne’ebé haforsa feto sira bele partisipa iha aspeitu no área hotu, iha nivel nasional no lokal.

Rate this item
(1 Vote)

Independente Digital TV