Aleinde, hasa’e mós koñesimentu sira nian iha nivel akademiku.
Tuir Magnifiku Reitór, Salustiano dos Reis Piedade, hatete, liu husi asina akordu ne’e bele kria kooperasaun diak liu tan ba futuru, hodi fó nafatin oportunidade ba estudante DIT sira, bele aprende no pratika iha área bee nian.
Magnifiku Reitór ne’e deklara katak, DIT iha vontade tomak apoia Bee Timor-Leste, Empreza Públika, bainhira persiza rekursu umanu ruma, hodi halo peskiza ba bee, DIT sei disponibiliza tempu, hodi servisu hamutuk.
“Ami nia estudante la’ós agora mak atu ba estagiu iha ne’ebá, maibé dala barak ona sira bá, tanba ne’e, formalmente liu husi asina akordu,”dehan nia iha Salaun Auditoriu, DIT, (09/11).
Iha biban ne’e, Magnifiku Reitór mós agradese tebes ba BTL, E.P nia kolaborasaun durante ne’e, hodi fó oportunidade ba estudante sira, bele hala’o estajiu no peskiza iha instituisaun refere.
Iha fatin hanesan, Prezidente BTL,EP Carlos Peloi hatete, BTL,EP nafatin fó oportunidade ba estudante sira husi fakuldade enjiñaria atu bele estajiu iha fatin refere.
"Espera ho kooperasaun ida ne'e bele fasilita estudante sira atu bele estagiu no peskiza, nune'e ita bele koko teknolojia sira ne'ebé iha futuru universidade sira bele produs iha área bee no saneamentu nian”,dehan nia.
Ezekutivu ne’e afirma, estudante estajiáriu sira, ne’ebé hala’o estajiu iha BTL, E.P, hanesan oportunu ida, hodi bele forma foinsa’e sira, ho kapasidade ne’ebé di’ak, nune’e ba futuru sira bele kontinua halo servisu ne’e ba oin. Tanba objetivu lolos mak dezenvolve setór bee, hodi lori bee hakbesik ba komunidade sira iha territóriu nasionál.
Líder BTL, E.P ne’e mós realsa katak, ho akordu kopersaun ida ne’e, bele halo insitutuisaun rua sai amizade liu tan, hodi apoia servisu hamutuk iha setór bee no saneamentu.
Entretantu, iha biban ne’e, Prezidente BTL, E.P aproveita tempu informa Magnifiku Reitor DIT ho Dosente sira, atu bele transmite mensajen importante ba estudante sira, oinsa bele iha inisiativa hodi halo konservasaun ba bee matan, liu husi asaun pozitivu hanesan kuda ai oan no labele sunu rai.
Enkuantu, Ezekutivu ne’e mos husu atu bele partilla informasaun katak, kuidadu sistema ezistente no komunidade sira bele kontribui selu tarifa bee moos.
