Domingu, 24 Outubru 2021 | Login
PM Taur simu vasina iha Klinika Farmoza. Foto:Dok/Independente. PM Taur simu vasina iha Klinika Farmoza. Foto:Dok/Independente.

PM Taur iha Ona Faze Rekuperasaun ba Infetadu Covid-19

DILI: Primeiru-Ministru (PM), Taur Matan Ruak, inferadu Covid-19 iha semana kotuk, nune’e, hala’o hela auto-izolamentu iha nia rezidenzia Metiaut no dadauk ne’e iha ona faze rekuperasaun nian.

Ministru Prezidénsia Konsellu Ministru, Fidélis Manuel Leite Magalhães hatete, Primeiru Ministru Taur Matan Ruak, aujensia iha reuniaun Konsellu Ministru, tanba Infetadu Covid-19.

“Ita-nia Primeiru-Ministru aujente dala ida tan, tanba señór Primeiru-Ministru moras, maibé iha ona rekoperasaun ne’ebé di’ak, iha teste ne’ebé halo, señór Primeiru-Ministru positivu ho Covid-19, maibé momentu ida-ne’e, Primeiru-Ministru halo hela auto-izolamentu no tuir hela rekomendasaun ne’ebé pessoál saúde hato’o,” dehan nia iha Ministériu Finansas, kuarta ne’e (01/09).

Governante ne’e afirma, ho grasa Maromak nian, Xefe Governu nian saúde komesa rekopera, tanba hetan protesaun husi vasinasaun kompleta.

“Ho ida-ne’e ita bele dehan katak, rekoperasaun la’o di’ak, grasas Maromak nian, tanba iha ona protesaun ne’ebé ita nia Primeiru-Ministru hetan husi vasinasaun kompleta, entaun sintomas sira ne’e la’os sai prekupasaun bo’ot, relasiona ho saúde señór Primeiru-Ministru nian,”tenik Fidelis.

Fidelis hatutan, la importante atu públiku hakarak hatene kona-ba, PM Taur detetadu positivu Covid-19 iha sa loron, maibé importante komprova positivu Covid-19, nune’e bele halo tuir nafatin regra saúde nian.

“Ha’u hanoin asuntu ida ne’e ladun importante, importante liu mak iha komprovativu katak, iha teste PM bainhira sente katak iha moras, halo tuir hotu rekizitus hirak ne’ebé saúde nian impoin,” dehan Fidélis.

Entretantu, Primeiru-Ministru, Taur Matan Ruak la partisipa iha reuniaun Konsellu Ministru, iha loron kuarta (25/08) semana kotuk, tanba rezultadu hatudu positivu Covid-19,  nune’e, Konsellu Ministru dirije husi Vise-PM dahuluk Armanda Berta dos Santos.

Ho nune’e, KM kuarta horseik (01/09) mós PM la partisipa, tanba seidauk rekupera, nune’e Konsellu Ministru dirije husi Vise-PM daruak José Maria dos Reis.

 

Asistente Editor: Saturnina da Costa

Read 324 times
Rate this item
(0 votes)

About Author