Segunda, 25 Outubru 2021 | Login
Vasina positivu Covid-19. Foto:Dok/Independente. Vasina positivu Covid-19. Foto:Dok/Independente.

02 Setembru: Positivu Covid-19 iha 269, Mate Na’in 2

DILI: Sala Situasaun Sentru Integradu Jestaun Krize (SIJK) ohin (02/09) relata, ekipa konjunta saúde rejista tan kazu foun hamutuk na’in 269. Enkuantu ema ne’ebé mate ho Covid-19 hamutuk na’in 2.

Kordenador Forsa-Tarefas ba Prevensaun no Mitigasaun Surtu Covid-19 iha Timor-Leste, Dr. Rui Maria de Araújo hatete, kazu foun ne’ebé relata ohin iha Kapital Dili 139, Covalima 14, Baucau 22, Lautem 12, Vikeke 9, Aileu 2, Bobonaro 16, Ermera 27, Manatuto 4 no RAEOA 4.

“Husi totál kazu detetadu foun ohin, iha kazu 94 (35%) mak hatudu sintomátiku, sira ne’ebé simu ona vasina kompletu iha na’in 73 (27%) no sira ne’ebé simu vasina doze dahuluk iha na’in 28 (10%),”dehan nia iha komunikadu ne’ebé Online INDEPENDENTE asesu, kinta ne’e.

Aleinde, ohin SIJK mós rejista pasiente ne’ebé rekupera husi moras Covid-19 hamutuk na’in 262 no kazu ativu ne’ebé baixa hela Sala Izolamentu sira hamutuk na’in 4.485.

Nune’e, totál komulativu kazu konfirmadu sura husi loron 21 fulan-Marsu tinan 2020 to’o loron 02 fulan-Setembru tinan 2021 hamutuk 17.183.

Rui relata, kazu mate ne’ebé relata ohin, iha sidadaun Timor-Oan na’in rua ho identidade mane na’in ida no feto na’in ida, sira ne’e hotu seidauk simu vasina.

“Matebian feto ho idade 36, hela iha Díli no seidauk vasina, iha loron 21 fulan-Agostu 2021, diagnóstikadu iha HNGV ho sindroma insufisiénisia respiratoria aguda (SIRA) tanba Covid-19. Iha loron ne’e kedas matebian hala’o tratamentu iha Izolamentu Vera Crus. Enkuantu, matebian hakotu-iis ohin dader iha tuku 04:00 oras Timor-Leste,”tenik nia.

Aleinde, iha mós sidadaun mane ida ho idade 60, hela iha Díli no seidauk simu vasina, iha loron 2 fulan-Setembru 2021 diagnóstikadu iha HNGV ho sindroma insufisiénsia respiratória aguda (SIRA) tanba Covid-19. Matebian is-kotu ohin, iha tuku 13:25 OTL.

Nune’e, família husi matebian na’in rua ne’e, kordena ona ho ekipa saúde atu hala’o funeral tuir protokolu ne’ebé adopta iha Timor-Leste.

Tuir dadus total ema ne’ebé mate ho Covid-19 iha Timor-Leste hamutuk na’in 74.

Ho nune’e, husi horiseik (01/09) mai ohin teste PCR ne'ebé Laboratóriu Nasionál Saúde halo hamutuk 759 ne’ebé kompostu husi, Vijilánsia sentinela na’in  48, Contact tracing 88, Random Screening 129, Viájen sai husi serka sanitária husi Dili 212, Viájen internasionál 87 no Follow up iha kuarentena 195.

Teste PCR ne’ebé halo horiseik (01/09) iha Munisipiu sira seluk, RAEOA no HNGV hamutuk 481. Ohin, iha Izolamentu Vera Cruz, Lahane, HNGV no fatin seluk iha territóriu laran tomak, halo tratamentu hospitalizadu ba kazu detetadu pozitivu hamutuk 140.

Husi numeru ne’e na’in 17 grave,  na’in 95 moderadu no leve na’in 28.

Tanba ne’e, SIJK husu kompriensaun no pasiénsia populasaun iha Timor-Leste laran tomak, atu kolabora no kontribui atu vírus SARS-CoV-2, inkui variante Delta, labele hada’et ba ema barak liután, no favor hela iha uma, bainhira lapresiza atu sai.

 

Asistente Editor: Saturnina da Costa

Read 544 times
Rate this item
(0 votes)

About Author