Planu Harii Estaleiru iha Manatuto, Posibilidade Kompleta ho Manutensaun Ró Featured

By Januário Assunção Novembru 23, 2023 1974
Ministru Transporte no Komunikasaun, Miguel Marques Gonçalves Manetelu. Foto:DOK/INDEPENDENTE. Ministru Transporte no Komunikasaun, Miguel Marques Gonçalves Manetelu. Foto:DOK/INDEPENDENTE.

DILI: Governu Japaun liu husi kompaña privadu planu harii estaleiru ba produsaun Ró iha munisipiu Manatuto no posibilidade kompleta ho fatin manutensaun Ró Nakroma no Ramelau hodi bele redús kustu orsamentu manutensaun ba  Indonézia.

Ministru Transporte no Komunikasaun, Miguel Marques Gonçalves Manetelu informa, Ministériu Transporte no Komunikasaun halo ona diskusaun ho governu Japaun liu-liu kompaña privadu ne'ebe atu halo konstrusaun Estaleiru iha Manatuto no  iha posibilidade atu kria tan fatin manutensaun ba Ró estatal rua ne'ebé sempre lori ba Surabaya  halo manutensaun.

“Kuandu ha'u ko'alia ho Embaixadór Japaun, ha'u hatete katak karik bele kompleta mós ho fatin para hadi’a Ró (Nakroma-Ramelau) ne'ebe ne'e sei iha diskusaun, tanba ne'e investimentu privadu se ikus mai mak sira aseita di'ak ba ita hanesan ita hatete katak sei ita iha ona (Fatin Manutensaun) ita la presiza ba Surabaya,” Dehan Ministru Manetelu, ba Jornalista sira, hafoin partisipa Pose ba Prezidente Komisaun Funsaun Públika, iha Matadouru.  Kuarta (22/11).

Ministru Manetelu dehan, tanba iha Konsellu Ministru aprova ona dekretu lei ida ba inspesaun náviu, tanba dala-ruma Timor-Leste nia rekursu umanu sei menus, maibé ró sira-ne'ebe lori ba hadi’a iha li’ur, Timor-Leste seidauk iha tékniku atu halo inspesaun uluk.

Nia informa, entaun presiza inspetór sira antes ró sai tékniku sira halo uluk inspesaun ba ró ne'e atu ró ba ne'e atu halo manutensaun ba parte  saida.

“Ne’ebe ida-ne'e fazeadamente, tanba dekretu lei ne'e rua ida ba rejistu náviu no ida ba inspesaun ne'ebe karik ba oin, ita bele minimiza kustu halo manutensaun ba ró ne'e,” Nia Informa.

Molok ne'e, Kompañia Tsuneishi Shipbuilding Co. Lda husi Japaun aprezenta aan bá Primeiru Ministru Kay Rala Xanana Gusmão, hodi husu Governu fó lisensa bá sira atu loke frabika ka estaleiru Ró ni’an iha área munisípiu Manatuto.

Embaxadór Japaun iha Timor-Leste, Tetsuia Kimura hatete, akompana kompania Tsuneishi Shipbuilding Co.Lda mai hasoru Primeiru Ministru atu husu Governu Timor-Leste hodi apoiu fó lisensa.

Tanba reprezentante kompaña ne'ebé atu harii estaleiru naran kompania Tsuneishi husi fatin ida besik Hirosima iha Japaun. Sira mai tiha ona iha fulan agostu foin dadauk ne'e, mai atu haree fatin ne'ebé merese atu halo investimentu ba estaleiru ni’an.

“Ohin sira mai ho ha'u atu hasoru Primeiru Ministru atu troka opiniaun no fó hanoin hanesan informasaun ikus update ni’an sobre saida mak sira hetan tiha ona iha fatin ne’eba, depois sira mós husu apoiu ba Governu ba sira nia investimentu,” Dehan nia, hafoin akompaña Kompañia hasoru Primeiru Ministru, iha Gabinete Fronteira Maritima Palásiu Governu, Segunda (20/11).

Nia informa, sira sei halo estudu viabilidade kona-ba sira nia planu ida-ne'e, depois sira nafatin husu Governu atu fo lisensa ba sira nia planu investimentu ida-ne'e,

“Hanesan hatete tiha ona katak sira sei halo estudu viabilidade, mais iha futuru kompania ne'e mak sei deside kona-ba sira bele absorva trabalador Timor oan atu tama iha kompaña ida-ne'e hodi halo servisu,” Nia informa.

Nia fundamenta, neste momentu seidauk bele ko'alia kona-ba bainhira mak remata estadu viabilidade, tanba sira sei halo survei ida, depois husi ida mak sei halo estudu viabilidade ida-ne'e, hafoin inklui survei ba rai ni’an husi ida-ne'e mak sira bele deside.

Rate this item
(0 votes)

Independente Digital TV