BCTL rasik mós hasai ona komunikadu iha loron 24 fulan-Fevereiru tinan 2021 hodi rejeita informasaun sira ne’ebé sirkula iha momentu ne’ebá.
Nune’e governador informa katak, bazeia ba pedidu mai BCTL husi Ministeriu Finansas (MF), FRBNY hala’o ona tranferénsia ho montante millaun $200 dollar Amerika husi fundu petrolíferu ba konta jeral estadu nian iha looron 23 fulan-Fevereiru liubá.
Aleinde ida ne’e, FRBNY mós transfere ona ho total osan montante millaun $886.3 dollar Amerika husi konta Fundu Petroliféru ba konta Jeral Estadu nian durante tinan 2020.
Maski nunee, Governadór ne’e la klarifika detaillada kona-ba Orsamentu Jerál Estadu ba tinan 2021 nian, ne’ebé públiku preokupa. OJE 2021 ho montante millaun rihun $1,895, ne’ebé aprova ona iha Parlamentu Nasionál, loron 12 fulan-Dezembru tinan 2020 no Presidente Republika promulga iha loron 28 fulan-Dezembru.
Governador Abrão reitera fila-fali ninia deklarasaun públika liubá katak Banku Federal Rezerve Nova Iorke nian kontinua sai parseiru valiozu no konfiansa ida ne’ebé apoia ona BCTL iha jestaun konta Fundu Petrolíferu desde inísiu iha tinan 2005.
