Governu La Auturiza Bairu Sira Taka Dalan Featured

By Saturnina da Costa Marsu 12, 2021 372
Komunidade taka dalan iha bairu kampung baru, Dili. Foto media sosial. Komunidade taka dalan iha bairu kampung baru, Dili. Foto media sosial.

DILI:Governu liu husi Ministeriu Administrasaun Estatal (MAE), la autoriza bairu sira iha kapital Dili taka dalan.

Tuir Ministru Administrasaun Estatal (MAE), Miguel Pereira de Carvalho hatete, MAE seidauk fó autorizasaun ba autoridade lokal atu haruka komunidade sira iha kada bairu taka  dalan.

“Laiha instrusaun ka autorizasaun ruma tun ba lideransa komunitaria sira atu autoriza komunidade sira taka dalan iha kada bairu, aldeia no suku, porque ne’e regulamentu iha rezulusaun governu mak aprova husi Konsellu Ministru,”dehan nia foin lalais iha Ministeriu Finansas, Aitarak laran.

Tuir rezolusaun governu nian númeru 12/2021 iha loron 8 fulan marsu, ne’ebé impoin serka sanitaria no konfinamentu iha munisipiu Dili.

Iha rezolusaun ne’e, autoriza deit taka pontu entrada haat (4), mak hanesan Tasi-Tolu, Metinaro, Manleu Kasnafar no Palacio Nobre Lahane, inklui Mota-Marabia.

Enkuantu tuir observasaun Jornalista INDEPENDENTE Online nota iha bairu sira nafatin taka dalan atu nune’e ema husi bairu seluk labele tama.     

Entretantu Portavoz Komandu Jerál Polisia Nasionál Timor-Leste, Superintendente Xefi ArnaldoAraújo hatete, laiha autorizasaun husi PNTL ba autoridade komunitaria sira atu taka dalan iha kada bairu.

Tanba ne’e, nia husu ba komunidade sira atu loke fali dalan ne’e hodi ambulansia k ekipa konjunta saúde bele halo movimentasaun tama-sai bairo relasiona ho Covid-19.

Nia dehan, tuir rezolusaun Governu nian taka mak pontu entrada sira ne’ebé tama-sai Dili, ligasaun ba aplika serka sanitaria no konfinamentu obrigatóriu.

Rate this item
(0 votes)

Independente Digital TV