Tuir Diretor Diresaun Nasionál Empregu Exterior (DNEE), Filomeno Soares, hatete, familia traballador na’in 23 nee asina ona deklarasaun iha loron 29 marsu 2022, hodi ba servisu iha Australia.

“Serimónia ne’ebé halo atu oinsá parte husi Governu no família hodi assina deklarasaun atu sai hanesan komitmentu ida katak inan-aman no família prontu ona husik sira-nia oan, la’en husi sira nia le'et atu ba servisu iha ema nia rain,tanba ne’e, la'ós Governu mak obriga timoroan atu ba servisu, maibé Governu kria kondisaun de'it, oportunidade ne'e traballadór sira mak aproveita,” dehan nia ba jornalista sira iha salaun DNEE-Bekora, tersa horseik (29/03).

Nia hatutan, bainhira atu aproveita oportunidade ne'e, traballadór sira tenke kumpri rekezitu balun hodi assegura sira, bainhira servisu iha Aústralia tanba prosesu haruka traballador sira ba servisu iha rai-liur la'ós prosesu fasil, maibé liu-husi prosesu ne'ebé naruk. Ho ida ne’e, husu ba traballadór ne'ebé hetan ona, oportunidade atu aproveita ho didi’ak hodi bele loke dalan ba joven sira iha futuru.

Enkuantu, traballadór sira ne’ebé aranka ba Aústralia hamutuk na’in-23, kompostu husi traballadór foun na'in lima no traballadór tuan na'in 18, kompostu husi feto na'in haat, no mane na'in 19.

Aleinde, traballadór sira nee sei destaka ba kompañia haat mak hanesan, kompañia, Freshwater Quality Management hamutuk ema na’in neen, kompostu husi feto na'in haat no mane na'in rua.

Enkuantu, mane na’in 12 sei servisu iha kompañia Costa Farm, no mane na’in lima iha koampañia Brockfield.

Traballadór sira ne'e hotu sei servisu iha area hortikultura no hospitalidade, durante fulan sia nia laran.

Nia akresenta, aleinde, traballadór na’in 23 nee iha mós traballadór sira ne'ebé sei aranka ba Aústralia iha etapa daruak nia hamutuk na’in 17 kompostu husi traballadór foun na’in tolu no tuan na’in 14. Sira nee hotu sei servisu iha kompañia Costa Farm no Brockfield.

Nunee, tuir planu, traballadór ba etapa daruak nian sei aranka iha loron 1 fulan abril tinan nee.

Entretantu, reprezentante traballadór, Armindo Pintu Ribeiro hatete, nia parte senti kontente tebes tanba liu husi programa seasonal worker programe (SWP) ne'e bele ba servisu iha Aústralia. 

“Objetivu ha’u-nian mak atu hadi’a família uma laran nian, no kontinua estudu, ajuda alin sira ba eskola no mós sustenta familia”.