Domingu, 16 Maiu 2021 | Login
Sarani Katoliku partisipa iha misa Domingo, iha Igreja Katedral Santo Antonio Baucau. Foto Kontribuidor/Independente Sarani Katoliku partisipa iha misa Domingo, iha Igreja Katedral Santo Antonio Baucau. Foto Kontribuidor/Independente

Ohin Atividade Misa Lao Ona Iha Igreja Baukau Featured

DILI:Selebrasaun misa liturjia Domingo ohin (18/4) lao ona iha Igreja balun, iha Dioseze Baukau hafoin desizaun Konsellu Ministru hapara konfinamentu obrigatóriu no kontinua aplika de’it serka sanitária iha Munisipiu tolu, Dili, Baukau no Vikeke.

Tuir observasaun Online Independente, hatudu katak selebrasaun misa liturjia lao ona iha Igreja Katedral Santo Antonio Baucau no Igreja Santuariu Maria Auxiliadora Fatumaca.

Bispo Dioseze Baucau Dom Basilio do Nascimento deside reativa fali misa liturgia ne’e, liuhusi komunikadu sabdu (17/4), hodi fó autorizasaun ba sarani sira bele ba fali misa.

Tuir Bispo hatete, bazeia ba rezulusaun governu ne’ebé fó autorizasaun hodi hapara konfinamentu obrigatoriu.

Nune’e serka sanitaria mak nafatin vigor, no labele sai husi munisipiu ida ba munisipiu sira seluk.

“Ha’u mai fó hatene ba komunidade sarani sira hotu katak, ita nia selebrasaun liturjia no relijioza sira bele lao normal fali ona iha igreja sira,”dehan nia liu husi karta komunikadu ne’ebé Online Independete asesu iha loron sabado (17/04).

Ho nune’e Dom Basilio husu ba sarani sira atu nafatin tuir regras sira ne’ebé Organizasaun Saúde Mundial fó sai ona.

Atu nune’e labele fó biban atu moras Covid-19 bele hada’et no habarak-an liu tan iha Dioseze Baucau.

Entretantu bazeia ba desizaun Konsellu Ministru iha loron 14 fulan-abril tinan 2021, iha Palásiu Governu, aprova ona projetu Rezolusaun Governu nian, hafoin análize ba aprezentasaun kona-ba pontu situasaun epidemiolójika país nian, husi Sala Situasaun Sentru Integradu Jestaun Krize.

Projetu Rezolusaun Governu nian sira, ba kontinuasaun husi impozisaun serka sanitária iha Munisípiu sira hanesan Dili, Baukau no Vikeke to’o loron 2 fulan-maiu. Halo ona mós aprovasaun ba projetu Rezolusaun Governu nian sira ba impozisaun serka sanitária iha Munisípiu sira Ermera, Kovalima no Ainaru to’o loron 2 fulan-maiu. 

Nune’e, bandu sirkulasaun ema nian entre munisípiu sira-ne’e no sirkunskrisaun administrativa sira seluk, exetu iha kazu sira ne’ebé iha fundamentu forte tanba  razaun seguransa públika, saúde públika, asisténsia umanitária, manutensaun sistema sira abastesimentu públiku ka realizasaun interese públiku nian.

 

Jornalista: Saturnina da Costa

Editor: Jose Sarito Amaral

 

Read 691 times Last modified on Domingu, 18 Abril 2021 12:45
Rate this item
(0 votes)