Oan Sai Sasin: Aman Oho An Hafoin Oho Nia Feen iha Likisa Featured

By Domingos Gomes Abril 05, 2020 11044
Akontesimentu kazu omesidu nia aman oho aan hafoin oho nia feen iha dalan klaran husi toos ba uma. Fonte Foto iha media sosial (facebook) ho naran id Xisto IJ. Akontesimentu kazu omesidu nia aman oho aan hafoin oho nia feen iha dalan klaran husi toos ba uma. Fonte Foto iha media sosial (facebook) ho naran id Xisto IJ.

DILI:Oan feto sai sasin ba akontesimentu nia aman oho aan hafoin oho nia feen iha dalan klaran husi toos ba uma.

Feen ho laen ne’e mate fatin nakonu ho ran iha isin lolon ho ekipamentu kro’at, hanesan katana ho tudik iha sira nia sorin.

Akontesimentu ne’e iha loron domingu (5/4), tuku 11:00 dader, iha Aldeia Hatu-Makelu, Suku Asumanu Postu Administrativu Likisa, Munisipiu Liksa.

Komandante Interinu PNTL Munisipiu Likisa, Susperintendente Asistensia Polisia, Luis da Silva hatete, tuir informasaun preleminaria ne’ebé nia parte hetan katak kazu ne’e akontese, hafoin sira na’in tolu, aman, inan ho oan fila husi toos atu ba uma.

Tuir kronolojia kazu ne’e akontese, Jose Sampaio idade (48) ho Ajusta dos Santos idade (45) nuudar feen, hamutuk ho oan feto naran Nelsia dos Santos ho idade (8) sira sai husi uma ba toos.

Husi toos fila ba uma mak too iha dalan klaran feen ho laen hasesuk malu, nunee laen lori katana hodi ta’a mate tiha nia feen.

Hafoin ta’a mate nia feen, laen lori fali katana hodi oho rasik nia aan too sira na’in rua mate hotu iha fatin.

Hafoin akontesimentu Polisia Munisipiu Likisa too kedas iha fatin hodi asegura mate isin no rekolla evidénsia ne’ebé deskonfia laen uza hodi oho nia feen.

Mate isin dadaun ne’e polisia forensik evakua ona ba mortuariu Hospitál nasionál Guido Valadares Dili hodi halo autopsia.

“Mate isin dadaun ne’e iha ona dalan atu lori ba iha Ospitál Nasional Guidu Valadares (HNGV), atu halo autopsia hafoin ita bele hatene nia motivu lolos husi akontesimentu ne’e,”dehan Komandante Luis ba diariu INDEPENDENTE liu husi via-telefone (05/04).

Nia dehan, prosesu investigasaun hahú lao ona ba kazu ne’e no nuudar sasin forte mak matebian sira nia oan feto rasik.

Oan feto nuudar sasin forte tanba sira na’in tolu mak hamutuk ba toos no fila uma mós hamutuk too ikus nia aman oho an hafoin ho nia inan.

Maki nune’e, tuir Komandante ne’e dehan, motivu lolos husi kazu ne’e sei iha prosesu investigasaun.

Matebian na’in rua husik hela nia oan waku (8), feto na’in rua (2) no mane hamutuk na’in neen (6).

Rate this item
(2 votes)
Last modified on Domingu, 05 Abril 2020 21:35

Independente Digital TV