Tanba, sira preokupa tebes ho ema estranjeiru sira bele hetan fatin hodi halo negosiu maibé Timoroan rasik, susar tebes atu hetan fatin hodi faan.
Nia dehan, governu kria fatin ba sira, hafoin sira selu taxa mós labuat ida.
"Governu mak kria fatin karik hanesan ho sira ne'ebe faan aifuan iha lita store oin ne'e, ema bele mai barak liu, depois mak selu taxa mos labuat ida, depois hare jardin sira seluk ne'ebé sei mamuk hodi halo mós fatin iha ne'ebá atu faan nuu, ne'e diak uituan tanba iha Jardin Largo Lesidere ne'e barak mak faan iha fatin ida de'it depois ema ladun sosa," dehan Jonio Pires ba Online INDEPENDENTE iha Largo Lesidere, segunda ne’e (23/05).
Nia hatutan, governu orienta deit sira hodi faan iha tasi ibun largo no motael maibe laiha kontrolu no laiha kondisaun ba sira.
"Gestaun merkadu nian ou walikota kuandu mai ne'e duni ami tun sae de'it, hadau hotu ami nia sasan, mais agora haruka ami iha ne'e mais husik ami abandona deit la iha kontrolu, entaun kolega sira balun sai ba faan fali iha liur tanba iha ne'e ema ladun Sosa,"haktuir nia.
Iha sorin seluk, negosiante nuu, Manuel da Costa, husu mós, ba governu atu tau matan no kria fatin ne’ebé digno ba sira atu sira bele hala’o negosiu ba.
Nia haktuir, maske governu fo estandarte ba salariu minimu $5 dolar ba kada loron, maibé nia husu atu governu bele loke kampu traballu barak ho salariu loron ida $3 dolar mós la problema.
Atu nune’e, joven sira ba hotu servisu no labele halo problema.
Tuir nia, governu loke kampu traballu barak ne’e mós bele kontribui ona ba redus violensia no problema.
"ida ne'e hanesan servisu ida, governu tenke fasilita se lae ema bele halo problema no baku malu arbiru deit tanba ema barak frustadu hela tanba servisu laiha ba sira,"dehan nia.