Enkuantu, matebian Jape Kong Su hakotu iis ho tinan 97.
"Novidade triste, ita lakon ona Timor-Leste nia heroi bo’ot Avo Jape, na'in ba Timor-Plaza, ne'ebé dedika kuaze nia vida restu hodi kontirbui ba prosesu dezenvolvimentu nasionál,"haktuir komunikadu ne’ebé Online INDEPENDENTE, asesu, tersa ne’e (27/09).
Tan ne'e, PM Taur hato'o profunda sentidas kondolensias ba família matebian nian.
"Deskansa ho hakmatek iha Reinu Lalehan, nia obra no memória sei nafatin metin iha povu Timor nia fuan," tenik Xefe Governu.
Taur haktuir, Timor-Leste lakon timoroan ne’ebé investe nia osan tokon ba tokon iha ninia rai moris fatin hodi fó servisu ba timoroan sira seluk.
Enkuantu, Jape Kong Su hahú konstroi Timor-Plaza iha 2009 no lansa iha tinan plaza dahuluk iha Timor-Leste, iha tinan 2011.
Entretantu, Prezidente Republika José Ramos Horta, mós hato’o sentidu kondolensias ba matebian no familia.
“Ha’u hato’o kondolensia ne’ebé profunda ba familia Jape. Timor-Leste lakon mane ida ne’ebé di’ak liu, emprezario ida ne’ebé extraordinaria. Ninia tinan naruk tebes. Jape Kong Sun nia tinan naruk, nia husik hela ninia rikezas ba povu no nasaun Timor-Leste,”dehan Xefe Estadu.
Enkuantu, relasiona ho Jape Kong Su nia mate, Online INDEPENDENTE koko atu halo intervista ho Manager Timor-Plaza, maibé nia seidauk bele fó informasaun tanba nia rasik seidauk rona informasaun klaru kona ba na’in ba Timor-Plaza, Jope Kong Su nia mate.
Nune'e, notisia kompletu ligadu ho na’in ba Timor-Plaza nia mate, Online INDEPENDENTE sei fó sai hikas fali, bainhira hetan ona informasaun klaru husi Manager Timor-Plaza nian.
