Diretór Jeral MSSI, Rui Manuel Expostu, hatete, programa nee atu reduz pobreza iha Timor-Leste no ajuda Ministeriu Saúde reduz malnutrisaun no estimula ekomia uma laran.
"Kona-ba implementasaun programa Bolsa da Mãe Jerasaun Foun iha hela prosesu, agora halo hela diskusaun ba konsultasaun rejistu dizitalizasaun nian, tanba programa refere ami hakarak implementa uza sistema dizitalizasaun no la uza manual,"dehan nia iha salaun City8, Manleuana, sesta horseik (04/02).
Nia hatutan, programa refere sei rejistu iha sistema dizitalizasaun, nunee bele fasilita implementador no jestor sira atu hetan informasaun ho lalais. Nunee mós, hodi bele kontrola ezekusaun ba lalaok programa nee rasik.
Tanba nee, programa refere sei implementa iha tinan ida nee, ho nia orsamentu hamutuk dolar amerikanu tokon U$ 7.4.
Nia esplika, iha tinan ida nee, programa refere sei implementa uluk mak ba iha munisipiu tolu, tanba bazeia ba dadus estatistika 2015 hatudu, liña pobreza boot liu mak iha munisipiu tolu nee.
Enkuantu, tuir dadus husi MSSI, lista provizoriu ba benifisiariu sira neebé atu asesu ba Bolsa da Mãe Jerasaun Foun iha tinan 2022 hamutuk rihun 27.
Entretantu, programa nee sei implementa ba bebe ho idade 0 too tinan tolu, ho osan dolar amerikanu $20 kada fulan. Ba inan isin rua sira sei hetan dolar amerikanu $15, kada fulan too nia partu. Aliende, ba inan isin rua neebé partu bebe nee moris mai ho kondisaun defisiente, sei hetan tan osan adisional $10 ho total osan hamutuk $30.
Asistente Editor: Saturnina da Costa
