DILI: Koordenadora Jeral Surtu Covid-19 iha Ministeriu Saude, Dra. Odete da Silva Viegas hateten, kazu pozitivu foun Covid-19 ne'ebé relata ohin (05/02) iha Dili na’in 88.
Ho nu'une, total kazu ativu ne'ebe iha sala izolamentu hamutuk nain 457.
"Numeru kazu detetadu foun iha 88, ho taxa pozitividade iha pursentu 6,8 no kazu rekuperadu ohin laiha", dehan nia iha komunikadu ne'ebé Online INDEPENDENTE asesu, sabado nee (05/02).
Nia hatutan, total kumulativu kazu komfirmadu sura husi loron 21 fulan-Marsu 2020 to’o 4 Fevereiru 2022 hamutuk 20.328 no obitu iha nain 122.
Entretantu, iha oras 24 nia laran teste PCR ne'ebe Laboratoriu Nasional Saúde halo iha Dili hamutuk 376, kompostu husi vijilansia sentinela na’in 3, rastreiu ba kontaktu iha na’in 117, rastreiu ba aleiatoriu iha na’in 251, viajen internasional na’in 4, no follow up iha kuarentina na’in 1.
Aliende, teste PCR ne'ebé halo iha munisipiu sira seluk, inklui RAEOA no HNGV hamutuk 590.
Tanba nee, Ministeriu Saúde nafatin apela ba populasaun sira, atu aprezenta aan iha fasilidade saúde sira besik, bainhira sente isin manas, kakorok moras, inus been no mear, atu nunee bele tratamentu husi mediku sira.
Asistente Editor: Saturnina da Costa
