“Iha 01 abril tinan ne’e, ita hahú lansa programa bolsa da mãe jerasaun foun ba ita-nia inan-isin rua no labarik sira,” dehan Diretór Diresaun Nasional Asisténsia Sosiál, Lucas Tois ba Online INDEPENDENTE iha nia kna'ar Fatin, MSSI, Kaikoli segunda (28/03)
Nia hatutan, bainhira lansa no hahú rejistu ba progama ne'e, automatikamente prosesu ba pagamentu ne'e mós lao ona ka osan hahú tama ba konta bankaria inan- isin rua no labarik sira.
Diretór ne'e dehan, Banku Nasionál Komérsiu Timor-Leste (BNCTL) mak sei halo tranferénsia osan ba benefisiáriu sira ka liu husi ajensia seluk ne’ebé hetan ona sertifikadu legál husi Banku Sentrál.
Nia dehan, parte ekipa teknika hala'o ona sensibilizasaun ba programa refere, ba autoridade lokal sira iha munisipiu ne'e identifika ona husi parte governu nian.
Enkuantu, iha fulan abril no maiu nia laran, parte diresaun ne'e sei halo rekrutamentu ba pesoal saúde tuir planu atu koloka ba sentru saúde komunitaria iha postu saúde sira, inklui ba óspital referal sira, iha munisipiu tolu hanesan, Ainaro, Bobonaro no Regiaun Adminitrativu Especial Oekusse Ambeno (RAEOA).
“Iha dentru fulan rua nia-laran ita kontinua halo preparsaun ba tékniku rekrutamentu liu-liu ita mós fó formasaun ba pesoal rekrutadu sira kona-ba programa ne’ebé ita planeia ona,” nia dehan.
Tuir nia, sentru saúde no postu saúde iha munisípiu tolu ne’e hamutuk 93 entaun ekipa téknika sira tenke preparadu, nune’e bele implementa programa ne’e ho di’ak no susesu.
Entretantu Bolsa da mãe jerasaun foun ba faze dahuluk Governu sei fó uluk ba Munisípiu Ainaro, Bobonaro no Rejiaun Administrativa Espesiál Oé-cusse Ambeno (RAEOA), depois introdus fali ba munisípiu seluk to’o tinan 2025.
Enkuantu, montante orsamentu ba programa ne’e kuaze milaun $7.
