Diretor Jéral Servisu Koperativa Ministériu Saúde, Marçelio Amaral hatete, fatin 30 ne’ebé Governu prepara sei fahe ba Izolamentu 15 no Kuarentena 15.

Husi fatin sira ne’e sei akumula kapasidade kama hamutuk 1.142 ba Izolamentu no Kuarentena 369.

“Fatin sira ne’ebé ita prepara, ita konsentra liu ba iha kazu sira ne’ebé moderadu, grave no kritiku, se lae kazu ne’e sa’e bebeik ita laiha espasu no estadu sei laiha kapasidade sufisiente atu organiza,”dehan nia ba jornalista sira, iha salaun Palásiu das Cinzas, tersa ne’e (31/08).

Entretantu, fatin Izolamentu sira mak hanesan, Izolamentu Tasi-Tolu, Fatin Estadu Tibar, Ótel Fortuna, Ótel Novu Horizonte, Ótel Loekase, Apartamentu Eternity, Ótel Luxury, Ótel IQ, Mall Golgoga, Izolamentu Vera-Cruz, Izolamentu Lahane, Ótel SK, Ótel Vila-Verde, Ótel D.City, Kolejiu Akademia Polisia Komoro.

Nune’e, fatin Kuarentena mak hanesan, Ótel Beach Gardens, Ótel Excelsior, Ótel Fantija, Ótel Audian, Ótel Vila-Verde, Ótel D.City, Apartament Time-Square, Apartament Carla Mension, Regal Apartement, Funan Buras, Ótel Lux Clarita, INAP, Ótel Timing, Ótel Mei Yi, Ótel Dili.

Enkuantu, ba kuartu iha Izolamentu no Kuarentena, Governu sei selu depende ba iha kontratu, nune’e kada kuartu ida sei selu ho valor dolar amerikanu $20.

Enkuantu, fatin Izolamentu antes ne’e iha Dili laran hamutuk 12, kompostu husi Izolamentu Vera Crus, Óspital antiga Lahane, Ótel Novu Horizonte, Izolamentu Tasi-Tolu, Golgota Mall, SK Ótel Metiaut, Edifisiu Eskola Xina, Ótel Eternity Fatuhada, Edifisiu STM Bekora, Uma Padre nia iha Dare, Ótel Fortuna no Prizaun Bekora.

Nune’e, tuir dadus husi SIJK, total numeru komulativu kazu konfirmadu iha teritoriu laran tomak to’o ohin (31/08), hamutuk 16.682, kazu ativu 4.499, komulativu rekuperadu hamutuk 12.116 no komulativu óbitu hamutuk na’in 67.

Asistente Editor: Saturnina da Costa