DILI: Ministériu Koordenadór Asuntu Ekonomiku sei koordena ho Ministériu Komersiu no Industria atu reforsa kontrolu ba folin nesesidade baziku iha merkadu, relasiona ho impaktu funu iha Mediu Oriente ne’ebé bele afeta importasaun mai Timor-Leste.

Koordenadór Jeral MKAE, Jorge Carvalho Martins hatete, konflitu iha Mediu Oriente bele fó impaktu ba supply sasan importasaun, maibé to’o agora seidauk iha mudansa signifikante ba presu sasan baziku iha merkadu.

“Ita ko’alia kona-ba foos no nesesidade básiku sira seluk, to’o agora seidauk iha mudansa signifikante. Maibé governu sei kontinua kontrola sasan sira ne’e iha loja no merkadu,” dehan Jorge ba jornalista, Sesta (13/03).

Nia esplika, MKAE sei halo aprosimasaun ho negosiante no emprezáriu sira atu asegura katak folin sasan iha merkadu nafatin razoável.

“Ita lakohi loja ka emprezáriu sira aproveita situasaun ida ne’e atu hasa’e presu foos no sasan nesesidade báziku sira seluk,” nia dehan.

Jorge akrescenta katak MKAE sei servisu hamutuk ho MKI, AIFAESA no IKTL atu monitoriza sasan nesesidade baziku, tanba situasaun global bele fó impaktu ba kuantidade no folin sasan iha merkadu.

Governu mós husu ba negosiante sira atu hatudu seriedade no labele hasa’e folin sasan la ho justifikasaun.

“Bainhira presu sasan nesesidade baziku sa’e, negosiante tenke aprezenta justifikasaun loos tuir situasaun global ne’ebé akontese,” nia dehan.

Presu kombustível bele sa’e

Iha parte seluk, MKAE mós alerta katak konflitu iha Mediu Oriente bele afeta presu kombustível, tanba rota supply mina mai Timor-Leste liu husi área ne’ebé agora daudaun afeta husi konflitu.

Nia dehan, se presu kombustível sa’e, ida ne’e la’ós tanba kompaña sira hakarak, maibé tanba situasaun global mak obriga.

“Supply mina ba Timor-Leste barak liu husi área Mediu Oriente. Tanba ne’e, konflitu iha ne’ebá bele halo presu kombustível sa’e,” nia esplika.

Maske nune’e, MKAE nafatin halo koordenasaun ho MKI atu monitoriza emprezáriu sira ne’ebé importa no fa’an kombustível, atu asegura folin ne’ebé aplika iha merkadu razoavel.

Koordenadór Jeral ne’e hatutan, governu sei halo enkontru ministerial atu estuda polítika ne’ebé apropriadu hodi responde ba situasaun global ida ne’e.

“Ita nafatin akompaña situasaun funu iha Mediu Oriente no estuda didi’ak atu haree presu kombustível sa’e ho razoavel ka lae,” nia konklui.