Ministru Ensinu Superior, Siensia no Kultura, José Honorio informa, hafoin simu proposta lei husi UNTL, nia parte hato’o ba jurist atu haree.
"UNTL submete ona proposta lei kona-ba asedu seksual. Ha'u hato'o ba jurista sira atu haree no agora iha ona faze diskusaun. Maibé agora ha'u rona Sekretáriu Estadu Igualdade sira mós halo hela lei ida ne'e," dehan nia ba jornalista sira, iha Sentru Konvensaun Dili, Kaikoli, Segunda (26/01).
Ho nune’e, Ministru hatutan, MESSK sei koordena ho SEI oinsa atu ajusta lei ne’ebé iha ho proposta husi UNTL.
"Ami sei haree hamutuk.Se sira halo ona ita husu atu ajusta mós ho proposta husi UNTL nian atu bele regula dosente sira," nia dehan.
Tanba, tuir nia, problema boot iha Timor-Leste, dala-barak sosiedade no akademiku sira la respeita feto sira.
"Ita-nia sosiedade dalabarak la respeita feto sira, no mós iha kampus, profesor balun la respeita estudante feto sira, ida ne'e mak problema boot," katak nia.
Tanba situasaun ne'e,MESSK estabelese ona akorduida ho UN Women kona-ba asedu seksual.
"Se profesor sira komete asedu seksual tenke foti sansaun ba nia, labele hanorin no labele orienta estudante sira, ita prevene," katak nia.
Tuir nia, ema hotu iha responsabilidade atu hatete lae ba asedu seksual, tanba aktus ne’e la di'ak.
"Imajina se ha'u halo aktus ida ne'e ba labarik feto ida, primeiro, ita la respeita ita-nia inan ne'ebé hahoris ita, tanba ita halo ba ita-nia inan nia feto maluk," dehan nia.
Ministru lembra katak, iha tinan 2025 kazu asedu seksual akontese barak iha universidade sira, no ne’e tenke sai atensaun seriu ba ema hotu.
"Ita hotu nia responsabilidade atu eduka ita-nia oan sira, ita iha responsabilidade ba ita-nia sosiedade rasik," nia dehan.
Entretantu, iha fulan Outubru 2025, hafoin kazu asediu seksual iha UNTL sita atensaun públiku, parte UNTL submete esbosu lei kona-ba asedu seksual ba MESSK.
Iha altura ne’ebá, Ministru José hatete, esbosu ne’e parte UNTL submete hafoin akontese kazu asedu seksual iha Fakuldade Siénsia Sosiais no Politika.
"Ha'u envia ona ba asesor sira atu haree,” dehan Ministru iha Parlamentu Nasionál,Kuarta (05/10/2025).
Ekipa tekniku sei akompaña hodi haree no deskute molok haruka ba Ministériu Justisa hodi haree atu nune’e bele produs dekretu lei ne'ebé di'ak.
