Prezidente Repúblika, José Ramos Horta, simu Primeiru Ministru Austrália, Honorável Anthony Albanese, iha vizita ofisiál mai Timor-Leste durante loron rua ne’e, hatudu parseria ne’ebé dura ba tempu naruk entre nasaun rua ne’e.
Alende, Prezidente Repúblika hamutuk ho Primeiru Ministru, Kay Rala Xanana Gusmão, Vise-Primeiru Ministru sira, membru Governu no korpu diplomátiku sira, simu Primeiru Ministru, Anthony Albanese bainhira to’o iha Aeroportu Internasionál Nicolau Lobato ho serimónia benvindu tradisionál Timor-oan ni’an.
Nune'e, iha jestu ida ne’ebé reflete lasu pesoál sira amizade ni’an, PR Horta lori nia veíkulu elétriku Moke hosi aeroportu to’o iha Palásiu Prezidensiál Nicolau Lobato, akompaña hosi Primeiru Ministru Albanese no Primeiru Ministru Xanana, Kay Rala Xanana Gusmão.
Iha Palásiu Prezidensiál, Primeiru-Ministru Albanese simu ho serimónia ofisiál benvindu nian, ne’ebé inklui hino nasionál sira hosi nasaun rua, inspesaun hosi Guarda Honra nian no aprezentasaun hosi delegasaun sira hosi nasaun ida-idak.
Alende, lider na’in rua ne’e bá iha salaun ASEAN hodi halo asinatura ba livru bainaka nian no fotografia ofisiál ida, tuir kedas ho enkontru entre líder na’in rua ne’e, akompaña husi sira-nia membru delegasaun sira.
Iha enkontru bilateral ne’e, líder na’in-rua ne’e reafirma sira nia kompromisu atu reforsa mobilidade traballadór ni’an iha ámbitu programa Pacific Australia Labour Mobility (PALM) no promove kooperasaun iha matéria seguransa nian, iha ámbitu akordu bilaterál 2022 nian, ne’ebé abranje formasaun iha matéria defeza nian no hametin kapasidade polísia ni’an.
“Diskusaun sira seluk subliña apoiu ba kreximentu setór privadu no projetu estratéjiku boot sira, inklui dezenvolvimentu Greater Sunrise. Iha enkontru ne’e, PR Horta hato’o Timor-Leste nia agradesimentu kle’an ba Austrália nia apoiu konstante ba dezenvolvimentu iha setór oioin. Diskusaun sira foka ba hametin kolaborasaun iha diversifikasaun ekonómika, seguransa marítima no dezenvolvimentu kapitál umanu. Líder sira reafirma sira nia kompromisu atu reforsa mobilidade traballadór nian iha ámbitu programa Pacific Australia Labour Mobility (PALM) no promove kooperasaun iha matéria seguransa nian, iha ámbitu akordu bilaterál 2022 nian, ne’ebé abranje formasaun iha matéria defeza nian no hametin kapasidade polísia nian. Diskusaun sira seluk subliña apoiu ba kreximentu setór privadu no projetu estratéjiku boot sira, inklui dezenvolvimentu Greater Sunrise," Sita komunikadu ne’ebé online INDEPENDENTE asesu husi Media Palasiu Prezidente Republika, Kuarta (28/01).
Komunikadu ne’e afirma, iha enkontru ne’e konklui ho troka prezente entre líder na’in rua.
Purtantu, enkontru ne’e hahú iha tuku 10:30 dader, simu ho seremónia simu ofisiál, inklui Guarda de Onra iha dalan protokolu Palásiu Presidensiál, hodi presta onra bo’ot ba vizita Primeiru Ministru Australia nian. Hafoin ne’e, hala’o apresentasaun ba delegasaun sira, sei iha asina livru konvidadu no sesaun foto ofisiál iha Salaun ASEAN.
Iha tuku 10:50 Otl, lider nain rua hala’o enkontru restritu (tete-a-tete) iha Gabinete Prezidente nian, hodi diskute asuntu estratéjiku sira ne’ebé relasiona ho koperasaun bilateral, dezenvolvimentu sustentavel, seguransa rejionál no parcería iha área edukasaun, ekonómia no mudansa klimátika.
Iha tuku 11:10, enkontru kortézia kontinua iha Salaun Prezidente Nicolau Lobato, ho partisipasaun delegasaun rua nian. Iha momentu ne’e, hala’o troka Prezente ofisiál, foto hamutuk no deklarasaun Simbolíka (Meet the Press) hodi reafirma komitmentu líder na'in rua ba relasaun amizade entre nasaun rua.
Nune'e remata iha tuku 11:35 ho partida Onorável Primeiru Ministru Australia husi Palásiu Prezidensiál, marka enkontru diplomátiku (aenkontru Bilateral) ida ne’ebé importante no estratéjiku ba futuru relasaun entre Timor-Leste no Austrália.
