Membru Arte-Marcial Halibur Malu Hamoos Dili Featured

By Camilio de Sousa Abril 08, 2021 2907
Membru arte-marsial halo limpeja hamoos Dili. Foto Camilio de Sousa/INDEPENDENTE Membru arte-marsial halo limpeja hamoos Dili. Foto Camilio de Sousa/INDEPENDENTE

DILI:Kór ketak-ketak laos bareira ida, atu hatudu nafatin ita nia apoiu no solidaridade bainhira nasaun ho povu hasoru situasaun ne’ebé defisil.

Hanesan membru arte-marsial sira hatudu dadauk, Kinta ohin (8/4) ne’e sira halibur malu, apoiu halo ona limpeja hamoos kapital Dili ne’ebé nakonu ho tahu no foer kauza husi inundasaun boot iha loron 3-4 fulan-Abril 2021.

Reprezentante Organizasaun Arte-Marsial, Filomeno Santa Cruz informa katak, membru arte-marisial, hanesan PSHTL, KORK no Kera Sakti hamutuk na’in 1000 halo limpeja jeraL hodi hamoos kapitál Dili ne’ebé foer husi inundasaun foin lalais.

Membru arte-marsial ne’e hanesan PSHT, KORKA no KERA SAKTI halibur malu iha  Edifisiu Sekretario Estadu Juventude e Desportu hodi simu orden hamoos Dili.

"Orgazanizasun tolu ne’e hetan orden husi ida idak nia lideransa no ohin dader ami hotu-hotu mai konsentra iha SEJD hodi simu mensajen husi Sekretario Estadu Juventude e Desportu hodi hamutuk halo limpeza ba tahu no foer sira iha Dili laran impaktu husi inundasaun iha loron 4 semana kotuk,"dehan Santa Cruz, iha Bidau Mota Klaran ba Jornalista Online Independente iha Kinta ohin.

Tuir Sekretario Estadu Juventude e Desportu hatete, tempu agora laos atu tuku malu no inimigu ba malu maibé iha tempu defisil ne’e mai hamutuk tané liman ba malu husik tiha pasadu moruk sira ne’e, kria amizade no paz hodi kontribui buat ruma ba rai doben Timor-Leste.

Hafoin simu mensajen husi Sekretario Estadu Juventude e Desportu ohin dader, kontinua kedan halo limpeza iha Dili.

"Ami halo grupu rua, grupu ida ba limpeza iha  Aitarak Laran no grupu ida seluk mai iha Bidau Mota klaran, atividade limpeza ne’e mak hanesan hamos tahu iha estrada, hamos lisu sira ne’ebé iha baleta kuak, ami ne’ebé mai limpeza iha Bidau Mota Klaran, hamutuk kuaze 600 resin  no balu ba halo limpeza iha Aitarak Laran, total hamutuk na’in 1000 resin," dehan Santa Cruz.

Limpeza ida ne’e hetan seguransa masimu husi Polisia Nasional Timor-Leste.

 

Jornalista: Camilio de Sousa

Editor: Jose Sarito Amaral

Rate this item
(0 votes)

Independente Digital TV