Tuir Diretora Jeral Administrasaun Finansas-MEJD, Cesilia Maria Belo Assis hatete, tuir lolos material sira ne’e intrega ona antes hodi halo limpeza maibé Governu aplika hela serka sanitaria no konfinamentu obrigatoriu, no labele halibur ema barak.

Tanba ne’e mak, ohin MEJD intrega material limpeza ba Diretor kada eskola sira, atu bele halo limpeza iha eskola ne’ebé afeitadu husi inundasun.

“Ohin ami intrega material limpeza ba eskola lima ne’ebé afeitadu makas ba inundasaun iha loron 4 fulan-Abril mak hanesan, EBC Hera, Eskola Teknika Vokasional Hera, Eskola 5 de Maiu Bekora, EBC Sergio Viera de Melo no Eskola Sekundaria 4 de Setembru UNAMET Balide,”dehan nia iha serimonia intrega material ba Diretor eskola sira iha Edifisiu MEJD, Vila-Verde, tersa ohin (08/06).

Nia hatutan, material sira ne’e mak hanesan, aisar, balde, kanuru suru rai, Cariña, botas no enxada.

Nia esklarese liu tan, orsamentu ne’ebé MEJD hodi sosa material ne’e hamutuk rihun 3 resin, no mós apoiu husi parseiru UNICEF.

Entretantu, Deputy Reprezentante UNICEF, Scott Whoolery hatete, labele haree ba valor apoiu maibé oinsa atu bele fó apoiu atu servisu hamutuk lao ba oin.

Enkuantu, Diretor EBC Hera, João Reis da Cruz agradese ba Ministeriu tanba bele ajuda ona material limpeza ba eskola sira.

“Ita hein konfinamentu obrigatoriu ne’e remata, loke fali dalan atu nune’e ami bele halibur inan-aman, komunidade no alunus balun atu bele halo limpeza iha eskola refere,”nia informa.

Nia hatutan, EBC Hera iha sala de aula 12, sala kiik rua hanesan, biblioteka 1 no koperativas 1 mak afeitadu husi inundasaun, tanba ne’e prezisa mobiliza ema atu bele fase.

Asistente Editor: Saturnina da Costa