Ministru Edukasaun Juventude no Desportu, Armindo Maia hateten, programa konstrusaun  eskola rua ne'e tanba inisiativa husi komunidade.

"Eskola rua ne'ebé mak ita atu halo konstrusaun ne'e mak hanesan eskola Ensinu Báziku Filiál Rai-lulik iha aldeia Rai lulik, suku Kova, Postu-administrativu Balibo no Eskola Ensinu pré-eskolár Utedai  suku Raifun, postu administrativu Maliana," nia hateten iha suku Raifun, Maliana, Sábadu (08/10/2022).

Eskola rua ne’ebé mak MEJD konstrui ne'e tanba komunidade mak husu, tanba estudante sira husi Maliana no Balibo atu assesu eskola ba dook tebes.

Estudante sira husi Balibo atu ba eskola iha Batugade ho kilometru hitu no husi Maliana atu ba iha Maliana Vila ho kilometru neen.

"Bazeia ba preokupasaun sira ne'e ita nia komunidade husu, maibé iha tinan kotuk la tama iha ita nia planu. Ho ida ne'e iha tinan ida ne'e ita esforsu nune'e ita buka materiál emerjénsia hodi bele halo," nia dehan.

Materiál emerjénsia ne’ebé MEJD apoia  mak hanesan kalén, ai, pregu no seluk tán, husi material sira ne'e EBF Rai lulik sei Konstrui sala de aula tolu no pré-eskolár Utedai sala de aula tolu.

Iha fatin hanesan, Diretór Serbisu Edukasaun munsisipiu Bobonaru, Crispin Moniz hateten totál estudante ne’ebé mak Edukasaun munsisipiu Bobonaru rejista iha eskola rua ne'e hamutuk 120, kompostu husi EBF Railulik na’in 70 no Pré-eskolár Utedai na’in 50.

Munsisipiu Bobonaru iha Eskola Ensinu Pré-eskolár hamutuk 55, sei aumenta tan rua ne’ebé MEJD sei konstrui.