Tuir Ministru MAE, Miguel Perreira de Carvalho hatete, objetivu husi sorumutu ne’e mak atu disemina lei sira ne’ebé Parlamentu Nasional aprova ona iha tinan kotuk (2021), no promulgadu ona husi Prezidente Repúblika iha Novembru 2021. konaba estabelese poder lokal no desentralizasaun administrativa no lei eleisaun munisipal.
“Ohin ami konvida Administrador no Prezidente Autoridade Munisipiu sira, membru grupu traballu tekniku husi liña ministeriu sira, Diretor Jeral sira mai rona aprezentasaun konteudu husi lei rua ne’ebé ita sei hahú implementa iha tempu badak iha tinan 2023-2024,” dehan nia ba jornalista sira iha Hotel Timor, tersa ne’e (09/08).
Nia hatutan, ba lei refere, depende ba desizaun politika atu estabelese uluk iha munisipiu ne’ebé preparadu ona.
Entretantu, programa ida ne’e hetan apoiu husi projetu Desentralizasaun UNDP nian ne’ebé finansia husi UE no PNUD.
Husi Lei Podér Lokál no Desentralizasaun Administrativa sei iha area 18 husi kompeténsia mak inklui edukasaun, saúde, kultura, protesaun sivíl, enerjia, ambiénte, terras propriedade, notariadu no turismo nsst, mak sei transfere ba munisipiu sira.
