Ministru Administrasaun Estatál (MAE), Miguel Pereira de Carvalho hateten, programa UKL+ atu implementa modalidade UKL+ kategoria A no kategoria  B.

Nia dehan, UKL+ kategoria A ne’e destinadu fokus ba família ka komunidade ne’ebé kbiit laiha, tanba kauza husi situasaun balun ne’ebé la favorese ba sira nia moris ho kondisaun uma ne’ebé seguru hanesan sira ne’ebé faluk, orfonatu (inan-aman mate), vitima sobrevivensia no mos familia sira-ne’ebé hela mesak.

Pratikamente UKL+ kategoria A destinadu ba sira ne’ebe la’os kategoria UKL normál hanesan agora daudauk 4.000 iha tinan ida ne’e no 1.252 tina kotuk,  tanba UKL+ ne’e la’ós benefisiariu hotu-hotu atu hetan uma sira ne’e.

Tanba UKL+ ne’e ba benefisiairu ida, pelumenus aban-bainrua kuandu husik mundu tenke rai hela uma ne’e ba ema seluk ida, katuas oan, oan, subrinu no seluk tan.

“Maibé ita haree katak barak populasaun sira iha rural ke uma aat mas la tama kategoria ne’e, entaun sira labele sai benefisiariu UKL 4.000 tinan ida ne’e,” dehan Miguel, iha Parlamentu Nasionál, horisehik.

Nia hatutan, governu kria fali programa ida atu adverse posibilita kbiit laek sira seluk ne’ebé la tama iha grupu ne’ebá bele hetan asesu ba Uma Kbiit Laek mós.

“Maibé ninia diferensia mak ne’e, ida ne’e fo deit material konstrusaun atu sira bele halo rasik sira-nia uma. Governu sei fó material konstrusaun atu sira hahú husi jeru to’o uma ne’e remata, ami halo ona estimativa teknika ida,” nia hateten.

Miguel subliña, total konstrusaun inklui material konstrusaun no kustu maun-de-obra ne’e bele to’o kuantia orsamentu ne’ebé rihun US$13 ho modelu uma ida ke nia dezenu ne’e preparadu ona husi sekretariadu tekniku Programa Nasionál Dezenvolvimentu Suku (PNDS).

Purtantu, programa ne’e mak implementa ninia modelu uma ne’e sei diferente oin ho uma ida UKL daudauk ne’e, tanba uma ne’ebé dignu no uma ne’ebé iha kondisaun atu populasaun sira hela.

Nia hatutan, hanesan baibain hahu konstrusaun fondasi, hada bloku, reboka, taka kaleen ho kuanlidade diak no seluk tan, governu halo esitimativa ida iha área rurál nia kustu ne’e total rihun $13, maibé iha sidade bele menus ida ne’e.

“Ofisial PNDS sira sei akompaña komesa kadas husi distribuisaun materiál konstrusaun ate uma ne’e hamriik no sai realidade tuir dezenu ne’ebé sekretariadu PNDS prepara ona,” Miguel informa.

Nia afirma, objetivu mak atu garante uma ne’e ho dignu atu populasaun bele hela, ne’e mak kategoria fó deit material konstrusaun.

“Deputadus sira aprova tokon US$ 25 ami sei aloka osan ate tokon US$ 15 atu konstribui material konstrusaun ba familia minimu 1.100,” tenik nia.

Miguel informa, restu tokon US$ 10 atu ba halo uma Kbit Laek+ B hodi fó de’it kalen ba populasaun sira.

“Ne’e sei fokus ba familia sira ne’ebé mak relativamentu rendimentu ekonomiku naton, sufisiente iha sira nia uma laran atu moris, maibé la naton atu hadia sira nia uma,  atu nune’e sir abele moris iha saudavel, dignu no seguru,” nia informa.

Nia afirma, atu troka kalen ferujen sira deit maibé la’os atu troka sira-nia ai ka besi, maibé fó kaleen no prafuju de’it. Tanba ne’e, inisiativa ida fó ba populasaun grupu ne’ebá bele iha kbiit uitoan, atu sira bele ho fasilidade ne’e ho kaleen sira atu troka sira kaleen ne’ebé ferujen.

“Kalen sira ne’ebé mak ita sei fó ba familia sira ne’e, la’ós kalen arbiru deit, maibé kalen sira ne’ebé nia kualidade diak ho uma hamutuk 4.500 ne’ebé atu bele troka sira nia kalen hotu,” nia relata.