Nia dehan, projetu tolu husi Programa Nasional Dezenvolvimentu Suku, ne’ebé hetan inagurasaun mak hanesan, Uma Kbi’it Laek (UKL), Konstrusaun Bee Moos no Rehabilitasaun Sede Suku (RSS).
“Oitavu Governu ne'ebe lidera husi Primeiru Ministru Sr. Taur Matan Ruak, bele realiza programa ida naran Uma Kbi'it Laek, ne'ebé agora ita nia povo sente rasik,”dehan komunikadu ne’ebé Online INDEPENDENTE asesu iha pajina ofisial PNDS, sesta ne’e (22/07).
Nia hatutan, Governu kria kondisaun ne’ebé diak no digno ba nia povu, atu sira mós bele senti rejultadu husi ukun-aan ne’e no UKL hanesan programa ida ne’ebé Governu halo hodi hakbesik ba nia povu sira.
Tanba ne’e, Diretór ne’e husu ba benifisiariu sira atu tau matan ba no kuidade ba obra ne’ebé Governu halo ona liu husi PNDS, ne’ebé hetan apoiu mós husi parseiru sira hanesan Governu Australia ho PARTISIPA.
Iha fatin hanesan, Administrador Postu Ermera Vila, Alesander Soares Salsinha, agradese ba oitavu Governu liu husi PNDS ne’ebé bele implementa ona programa barak iha munisipiu sira, liu-liu iha Postu Administrativu Ermera Vila.
Nia fó ezemplo, hanesan iha Suku Riheu ne'ebé hetan projeitu tolu no ohin loron bele inagura hanesan UKL, konstrusaun bee moos no rehabilitasaun Sede Suku.
Aleinde ne’e mós, Reprezentante husi Embaxada Australia iha Timor-Leste Nina Soares, hato’o agradese no orgullu ba Governu Timor-Leste, ne’ebé ho esforsu tomak halo obra sira, ne'ebé agora povo sira sente.
Ho nune’e, nia dehan, Governu Australia sei apoiu nafatin liu-liu ba obra bee moos no estrada ne’ebé sei implementa liu husi PNDS.
Entretantu, Agostinho Ximenes hanesan benefisiariu ba UKL iha Suku Riheu, senti kontente no agradese ba Governu ne'ebé fasilita ona uma ba sira no senti seguru ona ba sira.
Nia haktuir, durante ne’e sira hela deit iha uma ne’ebé ho kondisaun ladiak no iha tempu udan, sira senti susar tebes no la seguru, tanba uma ne’ebé sira hela udan bee tama deit.
Enkuantu, benefisiariu ba Uma Kbi'it Laek iha Suku Riheu mak hanesan, Luis Salsinha, João Bosco no Agostinho Ximenes.
