“Ha'u preokupa tebes ho taxa kiak ne'ebé as tebes, enkuantu ema balun riku ba beibeik. Maiória ninia má nutrisaun (haan ladiak), liu-liu labarik sira nian, atraza dezenvolvimentu umanu no ne'e sai preokupasaun boot ida, tanba afeta ita-nia riku-soin boot liu maka jerasaun aban-bainrua,” dehan nia, iha Palasiu Prezidensiál Bairru-Pité, horisehik.

Nune'e, importante tebes kontinua kombate ki’ak no má nutrisaun ho forsa tomak atu bele iha jerasaun foin-sa’e timoroan saudável liu no ho kapasidade boot liu atu intervein iha área oioin dezenvolvimentu, iha tinan sira tuir mai.

Governu ne'e aposta hela iha ekonómia nasionál diversifikadu liu, sustentável liu no produtivu liu ho orsamentu programa nu'udar instrumentu importante. Biar sei iha hela faze inisiál, ida ne'e mak dalan loos ba Timor-Leste atu bele hamenus dependénsia husi rekursu naun renovável sira, hanesan petróleu no gás, no hasa'e ninia sustentabilidade finanseira.

Entretantu, PR Lú Olo husu ba jerasaun foin-sa’e timoroan hein husi imi, Governu, polítika sira ne'ebé bele garante sira nia partisipasaun tomak iha atividade dezenvolvimentu nasionál no nune'e, importante tebes hasa'e oportunidade empregu ba foinsae sira.

“Ha'u apela ba Governu no mós ba partidu polítiku sira ho asentu iha Parlamentu Nasionál atu sai efetivu liu tán iha imi nia relasaun ba malu atu nune'e ita boot sira bele partilla no asume hamutuk dezafiu importantes ba dezenvolvimentu,” haktuir nia.

Molok ne’e, tuir kompromisu ne'ebé  Lú Olo fó sai iha loron bainhira nia simu poses, nu'udar Prezidente Repúblika, iha 20 maiu 2017, nia sei kontinua koopera ho Governu Timor-Leste. Ba hotu-hotu nia di'ak.

“Ha'u kontinua halo buat hotu-hotu ne'ebé ha'u bele halo no tuir Konstituisaun haruka. Ha'u sei koopera mós ho órgaun soberania sira seluk atu Estadu Direitu Demokrátiku hametin ba bei-beik no mós ba unidade Estadu no Povu nian, atu hotu-hotu bele kontribui ba dezenvolvimentu nasionál ho sussesu no atu ita hetan liután justisa sosiál iha ita-nia País,” tenik nia.