Estabelesimentu embaixada ne’e, tuir Sekretáriu Jerál Ministériu Negósiu Estranjeiru no Kooperasaun (MNEK), João Câmara hatete, nu’udar avansu ida iha relasaun diplomatiku Timor-Leste nian.
“Ohin, loron ida ne'ebé importante ba Timor-Leste tanba ba dahuluk embaixada iha Índia hahú relasaun diplomátika ho Índia,” dehan Sekjer MNEK ne’e, hafoin asiste serimonia posse ba Embaixadór India, iha palasiu Prezidensia Repúblika, Kuarta (14/05).
Ida ne’e, tuir nia, ba dahuluk Timor-Leste haruka ninia Embaixadór ida hodi ba reprezenta nasaun no reprezenta Prezidente Repúblika iha Índia.
“Ne'e avansu ida tan, hakat boot ida ba Timor-Leste nia relasaun diplomátika. Habelar liu tan relasaun diplomátika iha mundu, imi hatete Índia hanesan nasaun ida importante, nasaun boot iha Asia.”
"Ne'ebé ba ita ne'e hakat boot ba oin, ho ita-nia reprezentante Embaixadór Karlito ba Índia, ita hein katak ita-nia relasaun iha área seluk-seluk ho Índia mós bele dezenvolve di'ak liu tan, no hametin ita-nia relasaun diplomátika, ita-nia relasaun amizade ho nasaun boot Índia," dehan nia.
Embaixaór TL ba India, Karlito Nunes agradese ba konfiansa ne’ebé nia hetan husi Xefe Estadu no Xefe Governu atu hala’o misaun nu’udar Embaixadór dahuluk ba India.
Tuir nia, relasaun bilaterál Timor-Leste ho Índia hahú kedas iha 2003.
Durante Simeira ASEAN iha Jakarta iha 2023, Primeiru Ministru, Kay Rala Xanana Gusmão, halo enkontru ho Primeiru Ministru India, Narendra Modi, hodi koalia kona-ba oinsa atu hametin liu tan relasaun bilateral nasaun rua ne’e.
“Entaun momentu ne'ebá mak ko'alia oinsá Índia bele loke nia Embaixada iha Dili (no) Timor-Leste bele loke iha Delhi,” dehan nia.
Ida ne’e, nia hatutan, reforsa mós ho vizita ofisial PR Horta ba India iha Janeiru 2024 ne’eb´koalia mós ho PM India kona-ba pontu importante iha kooperasaun entre TL ho India.
"Entaun prosesu ida ne'e, enkontru bilateral, mak lori mai iha Agostu tinan 2024 Prezidente Repúblika Índia (Droupadi Murmu) bele halo vizita estadu primeiro mai iha Timor-Leste.”
“Ne'e hanesan istória ida mai ita Timor-Leste tanba foin primeiravez Prezidente Índia mai vizita Timor-Leste," dehan Carlito.
