Prezidente Repúblika Jóse Ramos-Horta hatete, nomeasaun Embaixadór Carlito Nunes marka etapa importante ida iha Timor-Leste nia relasaun diplomátika ho Índia.
“Embaixadór Nunes lori esperiénsia, vizaun, no dedikasaun ne'ebé presiza hodi hametin lasu entre nasaun sira. Bainhira Timor-Leste kontinua nia viajen ba integrasaun rejionál no dezenvolvimentu ekonómiku ne'ebé boot liu, ita-nia parseria ho Índia reprezenta ida husi ita-nia relasaun diplomátika ne'ebé promete liu,” dehan Prezidente Horta liu husi komunikadu ne’ebé Online INDEPENDENTE asesu iha Pájina Prezidénsia da Repúblika Demokrátika Timor-Leste, Kuarta (14/05).
Tuir Horta, Timor-Leste no India mantein relasaun bilaterál ne'ebé forte dezde estabelese relasaun diplomátika iha 24 Janeiru tinan 2003, kolabora iha setór defeza, edukasaun, saúde, agrikultura no kulturál.
Relasaun ne’e sai metin liu tan iha 2024, marka ho partisipasaun Prezidente Ramos Horta iha Simeira Globál Vibrante Gujarat iha fulan Janeiru, iha ne'ebé Prezidente hasoru malu ho Primeiru-Ministru hodi diskute kooperasaun iha petróleu, gás, dijitalizasaun, no interkâmbiu edukasionál.
Enkuantu, momentu diplomátiku ida-ne'e kontinua ho vizita estadu istóriku dahuluk husi Prezidente Índia nian mai Timor-Leste iha Agostu 2024.
Nasaun rua estabelese misaun diplomátika permanente, nune’e Timor-Leste loke nia embaixada iha New Delhi iha fulan Outubru tinan 2024 no Índia estabelese nia embaixada iha Dili iha fulan Setembru tinan 2024.
Ida ne’e hatudu sira nia kompromisu ba malu atu hametin liu tan relasaun bilaterál no apoia Timor-Leste nia envolvimentu ho ASEAN.
Tan ne’e, Prezidente Ramos-Horta fiar katak nomeasaun Embaixadór Carlito Nunes sei eleva no hametin liu tan lasu amizade no kooperasaun entre nasaun rua ne’e, no halo ligasaun Dili-Delhi sai metin liu tan.
Tanba Embaixadór Nunes lori esperiénsia barak ba nia knaar foun. Antes ne’e, hala’o knaar nu’udar Asesor iha Unidade Servisu Relasaun Internasionál iha Gabinete Prezidénsia (2024-2025) no nu’udar Embaixadór Estraordináriu no Plenipotentiáriu ba dala 5 ba Nasoens Unidas (2021-2024).
Carlito Nunes dedika ona nia karreira hodi avansa interese Timor-Leste nian iha palku globál. Ninia esperiénsia profisionál inklui servisu distintu ho organizasaun internasionál importante sira, inklui tinan 20 ho Institutu Republikanu Internasionál, IRI, ne’ebé nia simu mós Prémiu Judy Van Rest, Institutu Demokrátiku Nasionál, Organizasaun Internasionál ba Migrasaun, no Misaun Nasoins Unidas nian iha Timór-Leste.
