Deklarasaun ne’e, Lere Anan Timur fó sai relasiona ho situasaun polítika ne'ebé la’o daudauk iha Timor Leste halo ema barak preokupa.
Nia esplika, bainhira hala’o prosesu libertasaun nasionál presiza mata-dalan ida hahú iha Komité Sentrál FRETILIN (CCF) ninia palavra orden katak, mate ka moris ukun rasik-aan. Ema sira ne’e ohin loron balun sei moris ne’ebé presiza atu rona sira.
“Ita bolu sira hanesan ita-nia aman sira hanesan aman ba nasaun Timor Leste maun Xanana, Mari, Ramos Horta, Abílio de Araújo. Sira ne’e mak ita dehan promotór ba ukun rasik-aan”, dehan Lere, iha diskursu II Kongresu Nasionál Komité 12 Novembru, iha Sentru Konvensaun Dili (SKD), horisehik.
Nia hatutan, kuandu sira na’in hira ne’e laiha Timor-Leste la sai nasaun ida.
Lere lamenta ho situasaun polítika atuál, tanba polítika sai oin seluk, situasaun polítika bele dehan destinu nasaun nian atu ba ne'ebé la hatene loos.
Nia konta tuir pasadu nian, iha 1985 saudozu Octa hakerek ninia konseitu ida katak 'Onde Vai Timor Leste' agora situasaun polítika agora ne’e mós enkuantu maun sira ne'ebé sai promotór ba ukun rasik-aan sira laiha konsensu Lere duvida destinu nasaun nian.
Alende ne’e, Lere mós husu nafatin atu asegura dignidade prestíjiu lider istóriku sira hanesan Xanana Gusmão, Ramos Horta, Mari Alkatiri no Abílio de Araújo.
