Relasiona ho ida ne’e, pasiente Alfredo Fernandes, husi Metinaru, husu staf sira ne’ebé hamoos ospitál laran, atu bele haree didi'ak kestaun ne’e, tanba dala ruma barata ne’e bele hamosu fali moras foun ba pasiente sira.

“Ha’u haree koridór sira ne’e iha barata”, tenik nia iha HNGV, Bidau-Dili, horisehik.

Nia hatutan, hahán más tenke taka metin, se la barata bele tama hotu iha laran. Situasaun ne’e mak durante ne’e akontese iha ospitál ne’e.

Hataan ba problema ne’e, Xefe Gabinete Kontrolu Kualidade no Komunikasaun Sosiál, Paulina Pinto hatete, kona-ba barata la'ós problema foun, maibé atu hapara ne’e tinan hirak nia laran sempre iha hela de’it.

“Barata la'ós problema foun. Barata ne’e iha tinan hirak nia laran ne’e sempre iha hela de’it”, tenik nia.

Nia esplika, barata ne’e sira sempre hamoos, maibé sempre iha hela de’it.

Ne’e duni, husu mós mak família pasiente sira atu bele kontribui hodi bele kombate mós barata ne’ebé mosu barak iha ospitál ne’e.

Solusaun ne’ebé agora daudaun Gabinete Kontrolu Kualidade hamutuk ho nia konsellu halo maka, loron-loron sira iha oráriu limpeza no mós halo avizu edukasaun ba família pasiente sira ne’ebé mai halo tratamentu iha ospitál.

Nia akresenta, pasiente ho ninia família sira maka mai lori sasán barak mai ospitál automatikamente barata sei lalakon no sei la redús, entaun esforsu ne’ebé ospitál halo maka fó edukasaun loron-loron halo limpeza jerál hodi hamenus, maibé atu hamate ne’e susar.

Nia reforsa, presiza tempu naruk hodi bele kombate. Maibé esforsu seluk ne’ebé halo maka ospitál mós prepara materiál hanesan hena kama, froñas no hena taka hahán hodi evita barata pasiente sira nia hahán.