Xefe Departamentu Medisina Intensivista ICU, Vidal Lopes de Jesus informa, durante tinan barak nia laran sala ICU iha de’it kama neen hodi responde ba kazu iha Timor-Leste laran tomak.

Kondisaun ida ne’e, tuir nia, defisil ba profisional saúde sira iha HNGV atu atende no akomoda pasiente barak iha sala ICU.

Maske hasoru hela problema ne’e iha tinan barak, maibé, nia dehan, parte HNGV laiha politika atu haluan tan espasu hodi aumenta tan kama.

“Tinan ba tinan ita-nia ospital mak nune’e hela de’it, kama ne’e mós iha hahú kedas ukun aan mai to’o agora,” dehan nia, iha nia knaar fatin, HNGV, Kuarta (23/03).

Ho problema ne’e, nia dehan, tekniku sira hato’o ona ba superior HNGV atu tau prioridade ba  planu asaun anual tinan 2023, nune’e bele halo mudansa hodi responde ba nesesidade ospital no pasiente sira nian.

Nia afirma, problema ida ne'e la'ós foin mak akontese, maibé hahú kedas Timor-Leste ukun aan to’o agora.

“Se populasaun aumenta kerdizer ema moras mós aumenta, maibé ita-nia kama iha ospital mak nune'e hela de'it, tanba ne'e ami husu atu muda politika ne'e hodi haree ba problema ne'e, labele nune’e hela de’it, Konsellu Ezekutivu tenke iha planu oinsá atu bele expande tan sala sira ne’e no aumenta kama atu nune’e kualidade atendimentu ne’e aumenta,” nia afirma.

Entretantu, relasiona ho preokupasaun ne’e jornalista tenta konfirma ho Diretór Ezekutivu HNGV maibé laiha posibilidade atu atende.