Komandante PNTL Munisipiu Dili, Superintendente Xefi Polisia, Orlando Gomes hateten, foin lalais festa iha fatin rua akontese konfrontu, ida iha salaun Paradise no ida iha Nelio Restaurante.
" Iha festa kazamentu ne'e, joven sira provoka malu no konsege tuda malu hodi rejulta sasan barak mak hetan estragus," informa Orlando Gomes ba Jornalista sira iha Kuartel Jeral PNTL, Kaikoli, (29/09).
Nia haktuir, hafoin akontesimentu ne'e, PNTL Munisipiu Dili nian liu-husi ekipa Task Force tun ba terenu hodi halo kedas atuasaun, maibé la konsege kaptura suspeitu sira, tanba kazu konfrontu ne’e envolve ema barak.
"Ita nia task force sira apoiu husi parte BOP ba to'o kedas fatin akontesimentu no halo atuasaun hodi normaliza situasaun iha area Metiaut,” tenik nia.
Prosesu ba kazu konfrontu ne'e, parte PNTL seidauk bele prosesa tanba to'o agora vitima sira seidauk ba hato'o keixa.
"To'o agora Eskuadra Kristu Rei seidauk simu keixa, tanba ne'e nafatin hein vitima sira hato'o keixa hodi halo prosesu ba oin, nune’e bele buka tuir suspeitu sira," nia relata.
Nia argumenta, iha konfrontu tuda malu ne'e rezulta kadeira no sasan balun rahun no sasan seluk mos rahun, tanba ne'e esquadra Cristu Rei nafatin hein keixa husi vitima sira.
"Ita momentu halo atuasaun no hakalma, maibe seidauk bele identifika suspeitu sira sira, tanba festa kazamentu iha fatin no ema barak tebes. Tanba ne'e, se mak senti sai vitima atu hato'o keixa, nune'e ita bele buka tuir suspeitu sira," nia informa.
