Inacio moris iha Ainaro iha 5 Dezembru 1994, oan husi Abel da Cruz ho Amelia Soares. Inacio nu’udar oan dahuluk husi maun-alin no feton na'in 7.
Nia hahú estudu iha eskola primaria Kareta Fatin hosi tinan 2001-2006, kontinua iha nivel pre-sekundariu iha eskola Venancio Verraz Ainaro 2007-2009 no kontinua ba sekundariu publiku Ainaro hosi tinan 2010-2012.
Hahu ninia nivel universitariu iha Universidade da Paz (UNPAZ), fakuldade siensia sosiais no umaniora, departamentu politika dezenvolvimentu hosi tinan 2013-2016.
"Perante ne'e infiltra mos iha asosiasaun estudante munisipiu Ainaro (ASEMA), asume kna'ar hanesan sekretariu jeral," dehan nia foin lalais ne'e.
Konta nia, iha 2017 involve mos iha organizasaun Konsellu Nasional Juventude Timor Lorosa'e munisipiu Ainaro (CNJTL).
"Simu kna'ar divizaun planu estratejia, au mezmu tempu involve mos iha partidu politiku PUDD nu'udar sekretariu jeral no la kle'ur iha mudansa uitoan asume fali nu'udar koordenador interinu partidu."
Afirma nia, iha 2019 hamutuk ho ninia kolega sira funda Movimentu Agrikultor Progresivu (MAP) iha Ainaro nu'udar sekretariu jeral, depois iha mudansa iha kongresu segundu asume fali kna'ar nu'udar prezidente MAP.
No ikus, nia informa mos, iha 2020 involve aan iha asosiasaun futebol Ramelau Ainaro, nu'udar II vise komite dezenvolvimentu tekniku, no iha 2022 kontratadu iha sub KRAM Ainaro hanesan administrasaun no finansas.
Ho esperiensia ne'ebé involve aan iha grupu komunitariu, partidu politiku no organizasaun estudante sira maka, ho fiar aan katak wainhira eleitu ba xefe suku sei servisu tuir ninia abilidade ne'ebé iha. No kontinua servisu hamutuk ho parte hotu-hotu ba dezenvolvimentu suku Ainaro Villa ninia di'ak agora no ba iha futuru.
