Francisco, Jerasaun Foun ho Misaun Foun ba Ossoala Featured

By Tomas da Cruz Outubru 26, 2023 2094
Francisco Gama da Costa Lobo, kandidatu Xefe Suku Ossoala, Postu Administrativu Vemasse, Munisipiu Baukau. Francisco Gama da Costa Lobo, kandidatu Xefe Suku Ossoala, Postu Administrativu Vemasse, Munisipiu Baukau.

DILI: Dezenvolve suku Ossoala liu husi programa lubuk ida ne’ebé sei fó moris di’ak ba povu sai nu’udar mehi boot husi jerasaun foun ida, Francisco Gama da Costa Lobo, hodi kandidata an sai Xefe Suku.

Francisco ne’ebé mai ho motto ‘jerasaun foun ho misaun foun ba dezenvolvimentu suku Ossoala’, hakarak atu dedika an hodi servi komunidade sira iha Ossoala, Postu Administrativu Vemasse, Munisipiu Baukau.

Programa ne’ebé Francisco iha atu implementa iha Ossoala bainhira eleitu sai nu’udar Xefe Suku mak dezeña mapamentu no monografia suku, estabelese uma kultura suku, sede aldeia no sentru juventude.

Aleinde ne’e, kandidatu Xefe Suku ne’e mós hakarak atu proteze, defende no esplora rekursu naturais tuir interese suku nian.

Franciso mós sei aselera atendimentu administrasaun suku nian ba komunidade ho dignu.

Aleinde ne’e, nia mós sei koopera ho autoridade aldeia hodi estabelese kooperativa suku no aldeia.

Haforsa no hametin servisu ho postu administrativu no suku viziñu sira, no mós parte relijiozu nian.

Francisco mós sei esforsu hodi realiza eventu no arte no mós desportu, hametin relasaun komunidade liuhosi dalan nahe biti-boot no kria relasaun servisu ho kompaña, ONG nasional no internasional.

Francisco Gama da Costa Lobo ne’ebé moris iha Dili iha 26 1980, nu’udar oan mane mesak mane mesak hosi feton na'in 3, husi aman, Francisco Cardoso Gomes da Costa Lobo (matebian), no inan, Felisbela Gomes.

Francisco hahú nia estudu iha SDN 3 Bidau husi tinan 1987-1994, kontinua ba SMP Negeri 2 Ainaro husi 1996-1999 no Sekundariu iha eskola 28 Novembru husi 2004-2006.

Hafoin remata eskola Sekundariu, Francisco kontinua estudu iha Universidade Dili (UNDIL) maibé tanba krize politika no militar iha 2006, nune’e nia deside par. Iha 2007, Francisco kontinua estudu iha Universidade Nasional Timor Lorosa'e (UNTL), foti departamentu lian Inglesh, fakuldade edukasaun arte no umaniora (FEAH), no livre teoria iha 2011.

Hafoin livre teoria, nia la kontinua hakerek monografia tanba okupadu ho atividade importante balun hanesan lidera Taekwondo hosi 2017-2020.

Ho ninia dedikasaun no komitementu iha Taekwondo, ikus mai Francisco asume kna'ar hanesan Vise Sekretariu Jeral Federasaun Taekwondo Timor-Leste.

Francisco la'os de'it inklina aan iha Federasaun Taekwondo, nia mós iha esperiensia servisu profisional balun, husi tinan 2015 to'o 2023 nia servisu iha gabinete ministeriu saude no sai mós tradutor iha Defence Cooperation Program (DCP).

Maski hala'o atividade ne'ebé masimu hodi jere federasaun Taekwondo, Francisco mos sente edukasaun ne'e importante, tanba iha 2011 nia livre teoria la konsege hakerek monografia, daudaun ne'e nia komesa hakerek fali monografia nune'e bele akaba tiha ninia estudu refere.

Maske okupadu ho atividade no servisu hirak ne’e, maibé Francisco konsiente katak edukasaun ne’e importante, tan ne’e iha tinan ida ne’e, nia hahú hakerek monografia atu bele akaba ninia estudu iha UNTL.

Ho midar no moruk moris nian ne’ebé Francisco liu ona, nia sente hetan bolu atu fó ninia kontribuisaun ba rai no povu ida ne’e.

Francisco sente katak knar Xefe Suku nu’udar kna'ar ne’ebé sagradu, tanba ho kna'ar ne'e bele hadi'a povu nia moris ka ho lia-fuan seluk karik ‘harii no hadi'a estadu husi baze’.

“Ha’u mai ho misaun atu ‘asegura, defende, konserva, dignifika no valoriza hodi garantia dezenvolvimentu suku’. Ha’u-nia vizaun mak ‘hanoin ida, suku ida, familia ida, kultura ida, defende atu hamorin ho responsabilidade’,” dehan Francisco.

Ho ninia motto: jerasaun foun mai ho misaun foun ba dezenvolvimentu suku Ossoala, Francisco hatudu ninia protidaun atu servi duni povu husi baze, bainhira nia hetan konfiansa iha eleisaun ne’ebé sei realiza iha 28 Outubru ne’e.

Rate this item
(0 votes)

Independente Digital TV

Tuir ami iha Twitter

Kalendariu Notisia

« April 2024 »
Mon Tue Wed Thu Fri Sat Sun
1 2 3 4 5 6 7
8 9 10 11 12 13 14
15 16 17 18 19 20 21
22 23 24 25 26 27 28
29 30