Tuir Segundu Komandante PNTL, Munisipiu Dili, Superintendente Euclides Belo, hatete molok ne’e iha pontu entrada lima ne’e koloka ona ema na’in 50 no tersa-feira ohin (9/3) Komandu Munisipiu Dili koloka tan ema na’in 57.
Husi ponte entrada lima, kada postu sira koloka ema na’in 10 no sira sei servisu tornu hodi bele garante seguransa ne’e.
“Sira bele halo tuir sira nia knar tuir tarefas ne’ebé ita fó ona ba sira. Nomós horsida lorokarik PNTL sei halo sosializasaun hamutuk ho autoridade sira munisipiu Dili nian,” dehan nia iha knar fatin, Kaikoli (9/3).
Belo hatutan, PNTL mós sei servisu hamutuk ho movimentu parte tasi nian atu haree ba bairu ka fatin sira ne’ebé halibur ema barak no ba fatin sira ne’ebé deteta kazu positivu sira, atu ema labele halibur malu barak.
Bazeia ba desizaun Governu katak sei hala’o serka sanitária ka konfinamentu obrigatóriu iha Munisípiu Dili, durante loron hitu, hahú oras 00:00 loron 9 fulan-marsu to’o oras 23:59 loron 15 fulan-marsu, ho posibilidade atu extende tan liu loron hitu.
Entretantu Sala Situasaun Sentru Intregadu Jestaun (SIJK) mós kontinua husu ba populasaun iha Dili laran tomak atu nafatin kalma, lalika pániku, hela deit iha uma wainhira laiha nesesidade atu halo movimentu bá-mai, pratíka nafatin medida sira ne’ebé ita hotu hatene ona:
- a) Uza máskara
- b) Fase liman bebeik ho sabaun ka dezinfetante ruma
- c) Wainhira kumprimenta malu, lapresiza kaer-liman, bensa-liman, rei-malu ka haku’ak malu
- d) Evita halibur malu barak
- e) Hamri’ik ka tur dook husi ema seluk, mínimu metru ida ho balu.
