DILI: Ministru Interior, Francisco da Costa Guterres deklara, sei aprezenta kandidatu na’in rua ba pozisaun Komandante Jeral no Komandante Jeral Daruak Polisia Nasionál Timor-Leste, ba Konsellu Ministru iha semana oin.
Maibé, molok aprezenta kandidatu refere ba Konsellu Ministru, Ministru Francisco sei aprezenta kandidatu refere ba Primeiru Ministru, Kay Rala Xanana Gusmão.
“Segunda-feira konsulta tiha ho Primeiru Ministru mak avansa proposta ne’e ba iha Konselu Ministru, dehan Ministru Francisco, iha palasiu governu, Kuarta (18/03).
Kona-ba informasaun katak, sei iha pakote rua ba Komandante foun PNTL, Ministru ne’e hatete, nia seidauk hatene kona-ba pakote.
“Ha’u laiha preferensia, PNTL hotu-hotu hanesan.Ofisiais superior ne’ebé priense rekezitus ne’e ha’u hanoin iha hotu, importante ita haree liu ba sira ne’ebé hakarak fó sira-nia kontribuisaun atu dezenvolve instituisaun ne’e sai profisional liu tan,” katak nia.
PDHJ: Tenke iha integridade no hatene istoria
Prevedor Direitus Humanus no Justisa (PDHJ), Vírgilo da Silva Guterres ‘Lamukan’ prefere atu Komandante Jerál no Komandante Jerál daruak PNTLtenke ema ne'ebé ho integridade no hatene istoria PNTL nian, liu-liu poskrize 2005-2006.
Tuir nia, lider foun tenke bele restaura no mantein dignidade polísia nian no harii komunikasaun ne’ebé efetivu iha instituisaun nia laran.
“Tenke iha integridade, ida ne'e mak importante, no nia tenke hatene istória PNTL ne'ebé klean nune'e bele halo dezenvolvimentu ba instalasaun ho di'ak," katak nia.
Iha fatin hanesan, Diretór Ezekutivu FONGTIL, Incêncio Xavier, subliña mós importánsia integridade, esperiénsia naruk iha PNTL nia laran, no kapasidade lideransa nu’udar kritériu prinsipál.
Diretór Ezekuta FONGTIL, Incencio Xavier hatete, ema ne'ebé atu lidera PNTL ne'e tenke iha integridade.
Nia mós enkoraja governu atu hahú konsidera feto sira iha pozisaun estratéjiku sira ne’e.
“Tenke promove ona feto hodi ita halo buat ruma ne'ebé hatuur ba igulaidade jéneru. Tanba agora daudaun ita iha Sekretária Estadu Igualudade no Inkluzaun maibé durante nomeasaun ba kargu Komandante Jerál no SegundoKomandante Jerál feto laiha,” katak nia.
Tan ne’e, nia afirma, tempu ona Governu promove feto ba kargu Komandante Jerál no Komandante Jerál daruak instituisaun seguransa ne’e.
