Kazu Foun 18, Pasiente Covid-19 Aumenta Ba 97 Featured

By Saturnina da Costa Marsu 14, 2021 554
positivu Covid-19. Foto: Google positivu Covid-19. Foto: Google

DILI: Sala Situasaun Sentru Integradu Jestaun Krize (SIJK) relata katak, domingu ohin rezista tan kazu foun 18 ho nune’e pasiente Covid-19 aumenta ba 97, kompara ho númeru sabado horseik nian 82.

Kordenadór Forsa Tarefa ba Prevensaun no Mitigasaun Surtu Covid -19 iha Timor-Leste, Rui Maria de Araujo informa katak, kazu foun na’in 18 ne’e iha mane na’in 4 no feto na’in 14, kompostu husi labarik ho idade tinan 12 mai kraik hamutuk na’in 4, ema ho idade tinan 16 to’o idade 44 hamutuk na’in 14 no sira la hatudu sintomas.

Husi total kazu foun iha leten sira na’in 14 iha Dili ho detalla hanesan tuir mai ne’e,

Kazu positivu 2 husi aldeia Mate Restu- Vila verde,Postu Administrativu vera cruz, postivu na’in rua ne’e kontaktu besik ho positivu ne’ebé loron 2 liu ba relata husi vijilansia sentinela iha sentru saude formoza.

Kazu postivu na’in 7 husi aldeia Lurumata 3, suku Fatuhada postu administrativu Dom Aleixo, positivu hirak ne’e kontaktu besik ho positivu ida ne’ebé loron rua liu ba ne’ebé relata husi vijolansia sentinela iha sentru saude formoza.

Kazu positivu ida husi aldeia Frekat suku bairu-pite, postu administrativu Dom Aleixo, positivu ida ne’e kontaktu besik ho positivu ida iha Cluster Ministeriu Finansas.

Kazu positivu ida husi aldeia fomentu 3, suku Comoro, postu administrativu Dom Aleixo, positivu ida ne’e kontaktu besik ho kazu konfirmadu ida husi Cluster aldeia 4 de setembru  ne’ebé hetan transmisaun husi nia la’en husi Cluster Ministeriu Transporte Komunikasaun.

Kazu positivu ida husi aldeia Tekateki, suku bairu-pite, postu administrativu Dom Aleixo, positivu ida ne’e kontaktu besik ho kazu konfirmadu ida husi aldeia 4 de setembru, ne’ebé hetan transmisaun mós husi nia laen iha MTK.

Kazu positivu ida tan husi aldeia Aimutin suku Comoro, positivu ida ne’e kontaktu besik ho kazu konfirmadu ida husi Cluster aldeia 4 de setembru ne’ebé hetan trasmisaun mós husi nia laen iha Cluster MTK.

No kazu positivu ida husi aldeia Tasimean, suku Comoro, positivu ida ne’e kontaktu besik ho kazu konfirmadu ida husi Cluster Emergency Obstetrics and Neonatal Care.

Ho nune’e kazu positivu iha munisipiu dili hahu husi loron 7 to’o loron 14 fulan marsu hamutuk 67, fahe ba Cluster 19 no Cluster foun na’in lima.

Kazu detetadu sira ne’e hotu namkari iha instituisaun tolu, iventu ida no suku neen iha postu administrativu vera cruz no Dom Aleixo.

Entretantu, husi kazu foun na’in 18 ne’e kompostu husi Dili na’in 14 no husi munisipiu Baucau na’in 4.

“Dadus jeral ba loron ohin, kazu foun na’in 18 , rekopera na’in 3 no atual baixa hamutuk 97.”dehan nia liu husi Zoom Call (14/3)

SIJK kontinua husu ba populasaun iha Dili laran tomak atu nafatin kalma, lalika pániku, hela deit iha uma wainhira laiha nesesidade atu halo movimentu bá-mai, pratíka nafatin medida sira ne’ebé ita hotu hatene ona:

  1. a) Uza máskara
  2. b) Fase liman bebeik ho sabaun ka dezinfetante ruma
  3. c) Wainhira kumprimenta malu, lapresiza kaer-liman, bensa-liman, rei-malu ka haku’ak malu
  4. d) Evita halibur malu barak
  5. e) Hamri’ik ka tur dook husi ema seluk, mínimu metru ida ho balu
Rate this item
(0 votes)

Independente Digital TV