Espesialista Pediatria, Milena M. Lay dos Santos informa, kuaze labarik ne’ebé baixa iha sala emerjensia to’o sala pediatria sofre moras dengue.

“Ita-nia kazu dengue aumenta tebes. Kazu ita haree hanesan surtu ona, loron ida iha sala pedeatria ita simu kazu kuaze 16 to’o 20 husi emerjénsia ne’ebé baixa,” dehan Milena iha nia knaar fatin, Salaun Pediatria, HNGV, Sesta (17/12).

Nia esplika, dengue nu’udar virus ne’ebé halo raan nakfera no provoka raan sai husi inus, kabun moras, muta, laiha vontade haan, halo liman no ain malirin.

“Dala-ruma susar atu salva tanba inan-aman lori oan ba iha fasilidade tarde ona,” nia dehan.

Tanba ne’e, nia husu bainhira labarik iha uma hetan ona sintomas isin-manas durante loron ida to’o rua, labele abandona no konsidera baibain de’it, tenke lori kedas ba iha fasilidade saúde hodi bele deteta antes.

Enkuantu tuir dadus, iha semana dahuluk fulan Dezembru labarik na’in rua mak lakon vida tanba  kazu dengue, kazu hirak ne’e la inklui hirak ne’ebé mate iha emrejénsia.

Iha sorin seluk, Diretora Servisu Saúde Munisípiu Dili, Agustinha Segurado hatete, labarik na’in rua husi na’in 502 tanba moras dengue mak lakon ona vida.

“Ita haforsa koordenasaun no komunikasaun di’ak atu responde ba situasaun agora tanba udan monu-rai mosu inundasaun iha fatin-fatin, bee nalihun,  ita hare situasaun ida ne’e sei lori kazu aumenta maka’as liu tan no moras oioin hanesan diarea, isin-katar no seluk tan,” dehan nia via telefone, Domingu (19/12).

Entretantu, tuir dadus husi Servisu Saúde Munisipiu Dili, iha tinan 2020 total kazu dengue hamutuk 807, husi númeru ne’e na’in hitu mak mate.