Prezidente INSS, Longuinhos Armando Leite hateten, numeru benefisiariu agora dadauk hamutuk rihun 98 no tinan oin idozus sira komesa simu ona $ 50 kada fulan.
“Numeru benefisiariu hamutuk rihun 98, nee duni ita prepara orsamentu ba 2022 nian kuaze millaun $35.600 resin, maibé ita nia Deputadu sira hakrak aumenta osan ba idozus sira, entaun ita propoin tan millaun $ 23, nunee total orsamentu hodi subsidia ba ferik katuas sira sae ba millun $58 resin, ida nee inklui ona maluk defisiensia sira,” dehan Longuinhos Armando Leite iha Parlamentu Nasional, (16/12).
Nia haktuir, bazeia ba Lei Enkuadramentu Orsamental bele ezekuta ona iha tinan, maibé presiza altera dekretu lei 2019, tanba Lei Enkuadramentu Orsamental 2022 nian atu hasae ba $50.
Lei Enkuadramentu Orsamental validu ba tinan ida deit, maibé agora tenke altera fali lei ida neebé implementa ona, tanba nee maka bainhira governu aprova ona Lei Enkuadramentu Orsamental, entaun iha fulan Janeiru tekniku sira tenke prepara fali proposta ba dekretu lei nee hodi muda (altera), depois lori ba Konsellu Ministru no Parlamentu Nasional hodi aprova, nunee bele implementa tuir lei nee.
“Pagamentu ita sei hahú fulan Juñu 2022, nee duni iha Janeiru tekniku sira tenke prepara ona para entrega ba Ministra hodi lori ba Konsellu Ministru no mai iha Parlamentu Nasional hodi aprova,” tenik nia.
Nia esklarese, dadaun nee INSS prosesu hela pagamentu ba idozus no defisiente sira ba faze ikus nian ho benefisiariu hamutuk rihun 93.
“Iha tinan 2021 ita halo pagamentu ba benefisiariu hamutuk rihun 93 no agora dadaun ita halo hela pagamentu ba faze ikus nian, tanba ita selu tinan ida dala rua. Tuir dadus neebé hau simu kuaze maioria distritu hotu-hotu halao hela pagamentu no orsamentu ba tinan 2021 ita preve milluan $36,” nia esklarese.
Antes nee, Deputadu proponente husi partidu PUDD, Antonio Benevides hateten, proposta 147 nee hanoin katak tempu too ona atu aumenta osan ba maluk defisiente no idozus sira, neebé uluk simu $30 kada fulan bele aumenta tan $20, nunee kada fulan sira bele simu $50.
“Bainhira Deputadu sira ba halo fiskalizasaun no hetan oportunidade vizita ferik katuas sira iha foho, ita sente triste hare sira nia kondisaun, tanba dala ruma balun defisil atu hetan fos.
“Ho razaun nee se bele aumenta tan sira nia osan, tanba ita akompana iha telvizaun ita nia idozu no maluk defisiensia hasoru problema barak iha sira nia uma,” dehan Antonio Benevides iha Parlamentu Nasional, foin lalais.
Antertantu Deputadu Bankada PD, Mariano Asanami Sabino hateten, proposta nee tenke vota, tanba razaun neebé ministru koalia nee ita tetu no hare hotu ona.
“Se ita dehan lei, entaun lei nee sa susar ida, se ita iha oras ida ka rua atu rezolve tia lei nee, osan $30 tau ona agora tau tan deit $20 nee sa servisu todan ida. Hau fiar katak Vise Primeiru Ministra bele ezekuta ida nee, kaundu ita tau,” tenik Assanami.