Tuir Diretór DNEE, Filomeno Soares, hateten, asina deklarasaun ne’e, hanesan faze importante ida ne'ebé antes traballadór atu aranka ba servisu iha rai liur persiza realiza, tanbá deklarasaun ne'ebé asina maka sai baze fundamental katak, família prontu husik nia oan, fen ka la'en ba servisu iha estarajeiru no la'os governu maka obriga.

"Ita haruka ita nia oan, fen ka la'en ba servisu iha rai liur, labele halo problema hodi fó presaun ba sira nia hanoin, tanbá servisu ne'ebé sira hala'o iha Australia todan tebes, antes sira hetan osan atu haruka mai, nune'e mós karik sira manda osan mai atu utiliza hó didiak," dehan nia liu husi komunikadu ne'ebé Online  INDEPENDENTE asesu, sesta ne'e (01/07).

Enkuantu, Diretór ne’e mós enkoraja, foinsa’e timor oan na’in 16   ne'ebé hetan ona oportunidade ba servisu iha Asutralia atu labele halai sai husi sistema, tanbá halai ses husi sistema sei tau aan ba iha risku.

“Nune'e mós ita sei lakon asuransia, servisu, sa’ude no karik hasoru problema parte governu la iha responsabilidade. Imi bele husi munisipiu no uma lisan ketak-ketak, maibé ba ona servisu iha Australia imi hotu husi Nasaun Repúblika Demokrátika Timor-Leste,”tenik nia.

"Ha'u husu imi haree malu hanesan maun alin no feton-na'an, servisu tulun malu no rai osan, nune'e fila mai bele hadi'a ekonomía familia no hasa'e kresimentu ekonómia nasaun nian,"haktuir nia.

Entretantu, traballadór na'in 16 ne’e,  kompostu husi mane na'in 5 no feto  na'in 11.

Husi sira na’in hirak ne’e, na’in 6 sei ba servisu iha kompaña Bulmers Farm no na'in 10  sei ba servisu iha kompaña Connect Group/AAA eggs.