CNC atribui premiu ne’e iha ambitu aniversariu CNC ba dala 16 ne’ebé realiza iha komarka antigu Balide.

Notisia jornal INDEPENDENTE ne’ebé konsege sai manan-nain ba kategoria ida ne’e ho titlu “Amika, Inan-nurak ne’ebé Hela iha Tia Nia Dapur” ne’ebé públika iha edisaun Tersa (05/10) tinan ida ne’e. Notisia ne’e hakerek husi jornalista estaziariu, Januário Assunção.

Aleinde kategoria ba media imprime, CNC mós oferese premiu ba kategoria media online ne’ebé manan husi Lafaek News.

Entretantu, iha 17 Outubru, iha komemorasaun trajedia Balibo Five, jornalista jornal INDEPENDENTE na’in rua, Jonio da Costa no Mariano Mendonca, hetan premiu ba kategoria Bernardino Guterres no Francisco Borja da Costa.

Istoria husi Maria Bani-been ne’ebé kapta iha foto ne’ebé Jonio hasai, konsege lori fotografu ne’e hetan premiu ba kategoria Bernardino Guterres.

Premiu ba kategoria Bernardino Guterres atribui ba jornalista ka fotografu ne’ebé nia obra jornalistiku ka foto jornalizmu konsidera di’ak liu.

“Foto sai nu’udar maneira ida ne’ebé fotografu uza hodi fó sai mensajen. Iha mensajen barak ne’ebé ita bele hetan husi foto Maria Bani-been—domin, dedikasaun, luta—mensajen sira ne’e mak ha’u hakarak hato’o liu husi foto ida ne’e,” dehan fotografu jornal INDEPENDENTE ne’e hafoin simu premiu iha Balibo, Sabadu (17/10).

Iha oportunidade ne’e, Jonio agradese ba KI no ekipa juri ne’ebé eskoila ninia obra hodi sai vensedór.

“Agradese mós ba jornal INDEPENDENTE, liu-liu ekipa redasaun nian, ne’ebé fó konfiansa mai ha’u hodi espresa talentu ne’ebé ha’u iha,” dehan nia.

Enkuantu, istoria husi labarik Oekusse na’in rua ne’ebé hakerek husi Mariano konsege lori jornalista ne’e hetan premiu ba kategoria Francisco Borja da Costa.

Premiu ba kategoria Francisco Borja da Costa atribui ba jornalista media imprime no online ne’ebé hakerek notisia asuntu sosial di’ak liu.

Istoria ne’ebé Mariano hakerek ho titlu “Hisik Kosar ba Etu Bikan Ida” ne’ebé públika iha jornal INDEPENDENTE iha 12 Outubru 2020 ne’e foti asuntu labarik sira ne’ebé la konsege goza sira-nia direitu nu’udar labarik.

“Iha ita-nia rai ne’e, liu-liu iha kapital Dili, lorloron ita hasoru labarik lubuk mak fa’an sasan, dala-ruma ita haree ida ne’e hanesan ona buat baibain, balun to’o la preokupa, tan ne’e ha’u foti istoria ne’e atu fanun netik ita atu labele esplora beibeik labarik sira, fanun mós governu no instituisaun kompetente sira atu seriu ona tau-matan ba problema labarik sira,” dehan Mariano.

Mariano agradese mós ba KI ne’ebé apresia ninia obra kiik ne’ebé nia halo, no agradese mós ba jornal INDEPENDENTE ne’ebé fó biban ba nia atu fó sai informasaun, liu-liu relasiona ho asuntu sosial.

Entretantu iha tinan kotuk 2020, Jornal Independente mos manan premiu dahuluk husi Konsellu Imprensa nudar “Media Diak Liu Iha Timor-Leste”.